Services

Tasiilami Innuttaasut illuaraat alianaassuup ataani atoqqaartinneqarpoq

Aggustusip 18-ani Innuttaasut illuaraat silagissumi, nerisassanillu ulikkaartumik atoqqaartitsinneqarpoq. Illuaraq Najukkami Ataatsimiititaliamiit Tasiilarmiunut tunissutaavoq.

Innuttaasut illuaraat Tasiilap kangerluata qinnguaniippoq, inuillu namminneq toqqarsinnaasimavaat angallammik ornigussanerlutik imaluunnit pisuinnarluti. Innuttaasut 20-it akornanni illuaqqamut pisuinnarput, 30-llu akornanni angallammik ornigullutik.

Illuaraq angallateqanngitsunut, imaluunnit angalanissamut periarfissaqanngitsunut unnuiartorfissatut atorneqarsinnaavoq, immaqaluunniit grilleriniaraanni aamma atorneqarsinnaalluni.

Inuusuttut Kulturikkut Illuat ukiarmi illuaraq pequsissaanik sanaartorput, illuaqqallu silataa qalipallugu. Paarlermik, tummeqqanik, aneerasaartarfissamillu sanasussaasimagaluarput namminnerli illumut allamut nutsermata kinguartikkallarpaat. Kisianni imaanngilaq illuaraq atornerneqarnissamut piareeqqanngittoq.

“Inuusuttut Kulturikkut Illuat kommuniminngaanniit sulilluarnerannik qujassuteqarfigerusuppagut”, Tasiilami facility konsulenti, Ole Jens Lundblad oqarpoq.

Sammisaqarneq ilorrisimaarnerlu

Atoqqaartitsinermi takkuttunut pølsinik grillerisoqarpoq, aamma kalaalimineqarlunilu assigiingitsunik imeruagassaqarluni. Grillerineq saniatigut erinarsortoqarluni nipilersortoqarpoq. Aammattaaq kina 20 minutsit iluani paarnanik amerlanerpaanik nuniassinnaanersoq unammissutigineqarpoq.

Kangerluup qinnguani ippernaqarnera ajoqutigineqanngilaq, inersimasuni ajugaasoq 550g nuniappoq, meeqqanilu ajugaasoq 350g nuniassimallugu. Nuniattut tamarmik akissarsitinneqarput. “Ulloq naggaserlugu eqqiaavugut– katersinerpaarlu eqqugassaqarluni. Atoqqaartitsineq aaqqissugaalluartumik ilorrisimaartumillu inerneqarpoq”, Ole Jens Lundblad oqaatsigaa.