Services

Naqqiissut: Sermitsiami ilanngutassiaq piviusunut naapertuutinngilaq

Sermitsiami ullormut saqqummertup saqqaani suliffeqarfimmik Tarrarmik piginnittup Storm Ludvigsenip Kommuneqarfik Sermersooq pisuunerarpaa, sulisut akissarsisissinnaannginnerinut.

Pisuutitsineq piviusuniit tunngavissaqanngilaq. Tarraq kommunip angerlarsimaffeqanngitsunut unnuisarfiutaa ingerlatsisussarsiuunneqarnerani makitaanikuuvoq, ingerlatsinermilu aningaasartuutit tamaasa akisussaaffigilerlugit, taakkununngalu ilaallutik sulisunut akissarsiat. 

Angerlarsimaffeqanngitsunut unnuisarfiup ingerlanneqarnissaanut Kommuneqarfik Sermersooq Tarrarmut akiliisarpoq. Akiliisarneq piffissaq eqqorlugu aamma ingerlatsinermi isumaqatigiissut naapertorlugu pisarpoq.

Isumaqatigiissuteqarnermut tunngasunik takussutissat Sermitsiamut saqqummiunneqarput.

Storm Ludvigsen oqarpoq, angerlarsimaffeqanngitsut amerligaluttuinnarnerat pissutigalugu aningaasartuuteqarneruleraluttuinnarluni. Taamatut oqarnermini piviusut puigorpai, Tarrarmummi akiliutigineqartartut oktobarip aallaqqaataani 2020-mi ukiumut 3.2 millioniniit 4,4 millioninut qaffanneqarput, tassanerpiaq angerlarsimaffeqanngitsut amerleriarnerat patsisaalluni.

Kiisalu Storm Ludvigsen oqarpoq, Corona pissutaalluni Tarraq amigartooruteqartoq. Taamaattorli Covid-ip ajornartoortitsinera patsisaalluni Tarraq saniatigut 400.000 koruuninik tapiiffigineqarpoq, angerlarsimaffeqanngitsunullu unnuisarfimmik pilersitsinermi, illersuutinullu tunngasut il.il. Kommuneqarfik Sermersuumiit akilerneqarput.