Services

Ittoqqortoormiit: Siunissami nipilersortartunngortussat

Juunimi Ittoqqortoormiini meeqqerivimmiunut atuartunullu nipilersornermik pikkorissaasoqarpoq, tassanilu peqataasut 50-60-illu akornanniipput. Sermersuup Nipilersornermi Ilinniarfiata aaqqissugarivaa, Johannes aamma Pipaluk Lynge Berthelsen ilinniartitsisoralugit.

”Sapaatip akunnerata ingerlanerani meeqqat piumassuseqarluarput akuulluarlutillu. Ullut arlallit nipilersuutinik sammisaqarput erinarsornermilu sungiusarlutik. Sungiusareermata illoqarfimmi tusarnaartitsipput. Tusarnaartitsinissaminnut pissangasimaqaat, piffissarli qaangiummat nuannaaqalutik tulluusimaarput, misigisartik nuannersoq uteqqikkusukkaluarlugu. Imaassinnaavoq siunissami nipilersornikkut takusalissagigut”, Sermersuup Nipilersornermi Ilinniarfiata pisortaa, Pipaluk Lynge Berthelsen oqarpoq.

Meeqqat nipilersuutinik assigiingitsunik ilinniartinneqarput, soorlu guitar, pattagiaq, bassi tumerparpaallu, saniatigullu tunumiusut kitaamiusullu aamma erinarsorlutik.

Meeqqerivik Paarsisor, atuareersunut paaqinnittarfik Arsarner, Ejnar Mikkelsinip Aluarpiaminngaanniillu peqataasoqarpoq. ”Aaqqissuussinerput ingerlalluaqaaq. Meeqqat malinnaaffigalugit nuanneqaaq. Arlallit nipilersornermik soqutigisaqanngikkaluarput, piffissallu ingerlanerani soqutiginnilernerat takullugu nuanneqaaq”.

Pikkorissaanerup aallartinnginnerani Johannes aamma Pipaluk Lynge Berthelsen juunip 11-ni meeqqanut tusarnaartitsipput. Inuiattup ullorsiornitsinni innuttaasunut tamanut aamma qititsipput, tassanilu meeqqat piginnaasatik atorlugit illoqarfimmiunut tusarnaartitsipput.

Johannes aamma Pipaluk Lynge Berthelsen tapiissuteqartarfimmiit Sermeq-miit tapiiffigineqareerlutik angalapput. Tapiissuteqartarfik Kommuneqarfik Sermersuup iluani kulturi nukittorsarniarlugu suliniutinut aningaasaliisarpoq.

”Sammineqartut saniatigut Ittoqqortoormiini nipilersornermik ilinniarfeqalernissaa naapissutigineqarpoq, tamassumalu piviusunngornissaanut neriuuteqarpunga”, Pipaluk Lynge Berthelsen oqarpoq.