Services

Borgmester imarsiornermi attaveqatigiit pillugit: Isumassarsiffigisinnaavugut ilinniarfigeqatigiissinnaallutalu

Ulluni makkunani Aalborgimi Kalaallit Nunaannut ulloqartitsisoqarpoq pingasunngornermilu  imarsiornermi inuussutissarsiutit inerisarnissaat pillugit isumasioqatigiinneq aallartippoq, ilaatigullu attaveqaatit piujuartitsinerlu sammineqarput kiisalu Aalborgimi umiarsualivimmi suleqateqartarneq aamma sammineqarluni Nuummilu qanittumi aallartittoq Maritime Network pillugu aamma saqqummiisoqarluni.

Borgmester Charlotte Ludvigsen: ” Aalborgiminngaanniit saqqummiunneqartut pissanganaqaat qularinngilaralu ilisimasat isumassarsiallu Nuummi atorluakuttoorsinnaassagigut kiisalu Aalborg kommunemi imarsiornermi tunngasunik suliaqartunut attaveqarnerput inerisarneqarumaartoq.

Aalborgimi ilinniartut pillugit suleqatigiipput, tassani ilinniartunik ataqatigiissaarisup suliffeqarfiit sulisunik piukkunnartunik ilinniartitsinissaannut tapersersuisarluni. Nuummi Maritime Networkip ukkutarisai aamma tassaapput piukkunnaateqartunik sulisoqartarnissaq.

“Kommuneqarfik Sermersuuminngaanniit ataqatigiiaat nutaat qujaruppagut imarsiornermilu tunngasunik ineriartortitsinermi siuarsaanermilu pitsaasunik atugassaqarnissaq peqataaffigerusupparput, soorlu Aalborgmi tamanna pikkoriffigaat. Nuannaarutigaarput Nuuk Maritime Networkip aqutsisui Aalborgimi Kalaallit Nunaannut ulloqartitsinermi peqataammata Aalborgimilu inuussutissarsiutilinnut saqqummiisinnaammata”, Charlotte Ludvigsen oqarpoq.

Nuuk Maritime Network 2021-mi maajimi pilersinneqarpoq, imarsiornermi tunngasuni piujuartitsiviusumik ineriartortitsinissaq siuariartornerlu anguniarneqarpoq. 50-it sinnerlugit ilaasortaqalereerpoq, ilaasortallu tassaapput Nuummi imarsiornermut tunngasunik suliaqartut.

“Nuuk Maritime Network nutaajuvoq, aallaqqaataaniilli imarsiornermut tunngasunik suliaqartut isumassarsiorfigisimavagut, soorlu ulluni makkunani Aalborgmi nunatsinnut tunngasunik sammisassaqartitsinermi. Qaaqqusaanerput peqataanerpullu nuannaarutigaarput, ingammik ulluni makkunani imarsiornermut tunngasut aamma sammineqarluarneranni, Cuno Jensen oqarpoq. Taanna Nuummi Maritime Networkimi ingerlatseqataavoq.