Services

Tunumiut torrallaapput! Takornarialerisoqaqqilerpoq

Tunumi innuttaasut Nunatta sinneranut sanilliullugit amerlanerpaat akiuussutissamik kapitissimapput. Taama pisariitsigaaq. Taamaattumik Tunumi takornarialerineq aallartissinnaanngorlutigulu aallartittariaqarparput. Maanna ukioq ataaseq sinnerlugu takornarialerinikkut ingerlanerluttoqareersorlu kaaviiaartitsilerlutalu siuarsaaqqilersinnaanngorpugut.

Tunumi aamma Islandimut Kitaanilu takornarialerinerup ammaateqqinneqarnissaa piffissami kingullermi marluulluta ilungersuutigaarput. Takornarialerineq nunap immikkoortuani isertitaqartitsisarlunilu suliffissaqartitsisarpoq, innuttaasullu eqqarsaatigalugit taamaattariaqarpoq. Nunatsinni akiuussutissamik kapitissimasuni Tunumi amerlanerpaajupput, isumaqartuarsimallutalu ammaaqqinnissamut akiuussutissalersuineq aqqutaasoq. Tunumi innuttaasut taamaalillutik taamatut oqarneq eqquutsippaat. Taamaattumik inuit akiuussutissamik kapitereerpata ammaaqqinnissaq neriorsuutiginikuusarput eqquutsikkumallugu oqartussaasuusugut iliuuseqarfigisariaqarparput ammaaqqinnissarlu piviusunngortillugu.

Nunarsuup sinneranut aqunneqarsinnaanngitsumik ammaasseqqinneq matumani pineqanngilaq – kisiannili takornarianut akiliilluarusuttunut Nunatta Kangiani pinngortitamik immikkuullarissumik kulturimillu misigisassarsiorusuttunut aqunneqarsinnaasumik ammaasseqqinneq pineqarpoq.

Taamaattumik Tunumi takornarialerinerup aallartisaqqinnissaanut qanoq iliorsinnaanerluta piffissami aggersumi misissuissaagut. Kommunimi illoqarfiit assigiinngitsut tunulliutinngisaannassavavut, aamma imaanngilaq Nunatta sinnerani innuttaasut tamarmik akiuussutissamik suli kapitinnikuunngimmata Tunu utaqqisinneqartariaqartoq. Islandimiit Kulusummut aqqutip pingaaruteqarluinnartup Tasiilap eqqaani takornariaqalersitseqqinnissaa ilungersorluta anguniassavarput.

Nalinginnaasumik silaannakkut angallannerit ammaateqqinneqarnissaannut Naalakkersuisunut kajumissaaruteqarusuppugut, taamaasiornikkut Tunumi takornarialerinerup piffissami aalajangersimasumi ingerlalluarnissaa anguneqarsinnaammat.

Allattut Charlotte Ludvigsen aamma Justus Hansen, Kommuneqarfik Sermersuumi borgmesteri aamma borgmesterip tullia siulleq