Sunngiffimmi sammisassaqartitsivik nutaaq Quassussuup timaani aasaanerani ukiuuneranilu tamanut sammisassaqartitsiviusussaq ammaanneqassaaq. Sunik sammisassaqarfiussanersoq illit aalajangeeqataaffigisinnaavat.
Arctic Park Nuuk, Nuup timaatungaani periarfissaqarluarpoq sammisassanik pissanganartunik ammaanissamut – ukiumi aasamiluunniit tikinneqarsinnaassasut takorluugaavoq.
Quassussuup tunuaniittoq sumiiffik Arctic Park Nuuk-mut piukkunnartuuvoq, pinngortitaq illoqarfimmut qanittumiittoq Nuummi innuttaasunit takornarianillu ornigarneqarluartalereersoq.
Sammisassat assigiinngitsorpassuit pilersaarutigineqalereerput. Ilaatigut sisorarneq, langrend, sukuutserneq, sisoraaserluni ooqattaasarneq, pisuttuarnerit, mountainbiking, qaqqasiorneq – allarpassuillu pineqarput.
Maannakkut Arctic Park pillugu isumassarsiannik tusarliussinnissannut periarfissatsialaqarputit. Aasaanerani sammisassamik aalajangersimasumik takorluugaqarpit? Imaluunniit ukiuunerani sammisassamik amigaateqartarpit? Ornigullutit aalajangiisartut workshoppertitsineranni isummat tusarliukkiartoruk.
Innuttaasut illuanni Illorput-mi workshoppertitsisoqassaaq:
Ulloq 19. juuli nal 17:30-19:00 ”Aasaanerani sammisassat” pillugit
Ulloq 27. juuli nal 17:30-19:00 ”Ukiuunerani sammisassat” pillugit
Nalunaarfissaq uunga Henrik Rasmussen Peqqinneq, Sunngiffik aamma Kulturi mail: hras@sermersooq.gl
Aamma suliniut pillugu annerusumik uani atuarsinnaavutit siunnersuuteqarlutillu saqqummiullugit.