Aalborgimi ulluni 10.-12. aggustip akornanni nalinginnaasumiit Erfalasorput ersarinnerussaaq. Tassami Kommuneqarfik Sermersuup illoqarfik ikinngutaata ”Aalborgimi kalaallit ulloqartinneqarneri” ingerlatissavaa, ikinngutigiinnerlu sivisusimavoq, tamannalu borgmesteri Charlotte Ludvigsenimit assut qujassutaavoq.
Kommuneqarfik Sermersuup Aalborg Kommuneatalu ikinngutigiinnerat 2002-miilli aallartippoq, Kalaallit Nunaannilu Danmarkimilu kommunit annertuumik aaqqissuunneqaqqissimapput, tamatumalu kingorna kommunit sorpassuartigut allanngortinneqarlutik. Sulili ikinngutigiinneq atalluinnarpoq.
”Sivisunerpaamik ikinngutigiissimasut nukittunerpaasarput, taamaapporlu aamma Aalborgimik ikinnguteqarneq. Piffissap ingerlanerani ikinngutigiissimanerput ataannarsimammat assut nuannaarutigaara, takoqqinnissarpullu qilanaaraara. Maanna mingutsitsinnginnissaq, piujuartitsineq imaatigullu inuussutissarsiorneq sammissavagut, taakkumi illoqarfitsinni assut pingaaruteqarput”, borgmesteri Charlotte Ludvigsen oqarpoq.
2019-imi Nuummi ulluni 14.-17. aggusti 2019 Aalborgip ulloqartinneqarnera ingerlanneqarpoq, 2020-milu marsip qaammataani kommunit taakku marluusut borgmesterii nutaamik ikinngutigiinneq pillugu isumaqatigiissusiorput 2024-mi tulliani nutarterneqartussamik.