Services

Tasiilami innuttaasut 232-it Tasiilaq kusanarnerulersikkaat

Tasiilami Najukkami ataatsimiititaliamut qinigaarlaat issiaannanngillat. Qinigaanerminniit qaammat ataasiinnaq ingerlareersoq illoqarfimmi saliinissamut innuttaasut 232-it peqataanissaannut piareertereersimavaat, saliineq iluatsilluartoq juulip arfineq-sisamaani ingerlanneqarpoq.

Tasiilaq illoqarfiup avatangiisigissaarluinnartoq, aamma illoqarfiup isikkua juunip arfineq-sisamaani innuttaasut 232-it ataatsimoorlutik namminneq kajumissusertik atorlugu maangaannaq eqqakkanik katersineratigut kusanarnerulersinneqarpoq.

Najukkami ataatsimiititaliaq qinigaarlaaq suliniuteqartuupput, taakku inuit nittartakkakkut naapittarfiitigut illoqarfiullu nivinngaavii atorlugit saliinissaq avammut ussassaarutigisimavaat.

Inuusuttut Inuusuttut Kulturikkut Illuaneersut, Igdlomeersut akisussaaffimmik tigusipput, taakku illoqarfiup immikkoortortaani agguartaarsimallutik eqimattani quliusuni akisussaasutut aqutsipput.

Inuusuttut ilaat, Malik Berglund Davidsen 26-nik ukiulik ikiutaavoq.

”Illoqarfik kusatsiallaqaat. Innuttaasut amerlasuut peqataasut maluginiarpara, taamaasilluni peqataanissannut kajungersilersippaanga, aamma tullissaanut peqataarusuppunga,” taama oqarpoq Inuusuttut Kulturikkut Illuanni Igdlomi kajumissutsimik sulialinni ilaasortaasoq, Malik Berglund Davidsen.

Saliinermi Kommuneqarfik Sermersuup, Materielgårdianiit, allaffimmi betjentiniit aammalu najukkami ataatsimiititaliami ataqatigiissarisuniit tapersersorneqarpoq, taakku eqqakkat katersat eqqaavissuaammukaarsorlugit aammalu katersisut eqqaavissaarutinnginnissaat imeruarsaataarutinnginnissaanullu ikiuullutik. Assinilu takuneqarsinnaapput eqqakkat qanoq amerlatigisimaneri.

Aaqqissuussaq iluatsilluartoq juulimi ingerlanneqaqqissaaq.