Nuummi inuiattut ullorsiorneq alianaangaaqisoq iluatsilluarpoq, silagissuup ataani aaqqissuussat assigiinngitsut innuttaasuniit ornigarluarneqarput.
Ullortunerup malunnartinneqarnera Kommuunip allaffiata eqqaaniit Nuutoqqap tungaanut ingerlaqatigiinnermik aallartinneqarpoq, tassani peqatigiiffiit erfalasunik tigummiartuullutik ingerlaqatigiittoqarpoq. Erinarsoqatigiit NIPE-kkut siulersortigalugit erinarsoqatigiittoqarpoq, qamutilittartoqareermallu puiseqqaanniuunneq aallartinneqarluni, puiseqqaanniuunnermilu inuit 50-it missaaniittut peqataapput, minnerunngitsumillu borgmesteri Charlotte Ludvigsen oqalugiarluni.
Ulloq immikkuullarissoq
”Juunip 21-iat tassaavoq ulloq immikkuullarissoq, inuppassuarnik qilanaarineqartartoq. Tassa kalaallit inuiattut ullorsiorfiat. Ulloq una ullunik allanik immikkuullarinneruvoq. Ullormi tassani asasagut peqatigisarpagut. Katerisimaartarpugut, nuannisaqatigiittarpugut ullorlu ataatsimoorluta malunnartittarparput, inuiattut killiffipput malunnartinniarlugu,” borgmesteri Charlotte Ludvigsen oqalugiaammini ilaatigut taama oqarpoq.
Kommunip aaqqissuussai arlaqarput, soorlu biologstationip eqqaani Nunarsuarmi Paggannerit annersaat ingerlanneqartoq. Nunarsuarmi Paggannerit annersaat ingerlanneqareermat grilleriffissaq ikinneqarpoq, tassani innuttaasut nerisassat namminneq nassatatik grillertissinnaallugit.
Borgmesterip oqalugiaataa taamaat uani atuarsinnaavat: