Sunngiffik

Kommuneqarfik Sermersooq Angalanissamut Aningaasateqarfimmiit agguaassisarpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ukiut tamaasa Kommuneqarfik Sermersooq Angalanissamut Aningaasateqarfimmiit agguaassisarpoq. Aningaasaateqarfiup siunertaa tassaavoq sumiiffimmi ataasiinnavissuarmi inisseqqasarnerup kingunerinik nuanniissinnaasunik pinaveersaartitsineq. Aammali kommunimi innuttaasut nunarsuarmioqataanermik misigisimanissaannik siunertaqartumik Kalaallit Nunaani avataanilu innuttaasut angalarusunnermik kissaateqarnerannik piviusunngortitseqataarusussuseq.

Ukioq manna Angalanissamut Aningaasaateqarfimmut 760.000 koruunit immikkoortinneqarput. Innuttaasut katillugit 76 qinnuteqarsimapput, aningaasanngorlugit 914.000 koruunit naliginut.

Qinnuteqartorpassuaqarmat sukannersumik pingaarnersiunissaq kingumut pisariaqarluinnarsimavoq. Qinnuteqartuni ilaqutariit meerartallit isertitakinnerusullu pingaanersiuinermi pingaartinneqarput. Ilaqutariit meerartallit akissaatikinnerusullu ukiuni kingullerni tallimani angalaarsimanngitsut salliutinneqarputtaaq.

Kommuneqarfik Sermersuumi innuttaasut tamavimmik qinnuteqarnissamut periarfissaqarput. Qinnuteqartut tamavimmik sukumiisumik Angalanissamut Aningaasaateqarfimmi Siulersuisuniit suliarineqarlutik, tamatuma kinguneralugu qinnuteqartut 54-it Aningaasaateqarfimmit tapiiffigineqarput.

Angalanissamut Aningaasaateqarfimmi Siulersuisuniit unnersuussutigineqarpoq angalaneq nunatsinni ingerlanneqassasoq, piffissaq manna nunatsinniit avammut angalaniarneq killeqarmat angalanissamullu tapiissutip ukiup tulliannut nuutsitsineqarsinnaananni.

Qinnuteqartut tamarmik toqqaannartumik nalunaarfigineqassapput.

Paasissutissat allat pissarsiarineqarsinnaapput Angalanissamut Aningaasaateqarfimmi Siuliattaasumut Inge Olsvig Brandt oqarasuammut: 559896