Meeqqat, Inuusuttut Ilaqutariillu

Ittoqqortoormiini atuartut nuuttariaqanngillat

Ittoqqortoormiini atuarfimmit kissaatigineqartoq atuartut annerit atuartinneqartalernissaannut atuartitsiviusunik alliliinissaq Kommunalbestyrelsip akueraa. Tamanna isumaqarpoq, meeqqat Ittoqqortoormiit qimannagit atuarnertik naammassisinnaaleraat, tamannalu atuarfiup pisortaata nuannaarutigaa.

Ittoqqortoormiini atuartut 13-14-inik ukiullit angerlarsimaffitsik qimallugu 1000 km Nuummut nuuttariaqartarsimapput atuarnertik naammassiniarlugu. Ilaannut pissanganarsinnaavoq allallu angerlarsertarput nuanniilliortarlutillu. Sisamanngormallu kommunalbestyrelse ataatsimeereersoq Ittoqqortoormiini atuarfik atuartut anginerit 10. klassip tungaanut atuartinnissaannut periarfissinneqarpoq.

”Tamanna atuartut atuarfiullu nuannaarutigeqaa. Ilinniartitsisunik ilinniarsimasunik amerlanernik atorfinitsitsisinnaalerpugut siunissamullu eqqarsaatersorsinnaalerluta. Taamaalilluta atuarfipput pitsaanerusumik ingerlalissaaq” atuarfimmi pisortaq Jonathan Petersen oqarpoq.

Inuusuttut, misigisassarsiorusuttut misilittagakitsullu
”Maani atuartitsineq ajunngilaq uangalu Nuummukarusuppunga”, Unuunu Lorentzen oqarpoq,  aamma Severin Anike aamma taamatut oqarpoq, 7. aamma 8. klassimi atuartut.

Atuarfimmi pisortaasup inuusuttut misigisassarsiorusunneri ilisarisinnaavai, inuusuttullu Nuummiilereeraangata ajornartorsiutaasinnaasut aatsaat takkussuuttarput. Inuusuttut ukiukillutik ungasissumut nuunnerminni ajornartorsiulertarneri takunikuuaa.

”Atuartut avatangiisini nutaaniileraangamik tulluarsarniarnerminni ajornartorsiuteqalertarnerat takusarparput. Ulluinnarni angajoqqaaminnut attaveqannginnertik pissutigalugu ilaatigut atuarnerminnik paarsiniarnerminnik ajornartorsiuteqarnerulersarput”, oqarpoq.