Politikki

Coronartoqarnerata nalaani qinersineq – siuleriiaani utaqqerusunngikkuit aallakkatigut qinersigit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Apriilip 6-ni qinersinissaq arlalinnik peqquteqartumik immikkuullarissuussaaq. Qinersisartut Inatsisartunut aamma kommunalbestyrelsimut kiisalu nunaqarfinni nunaqarfimmi aqutsisunut aamma Nuummi ilagiit sinniisaannut qinersisoqartussaavoq. Taamaasilluni qinersinermi Corona pillugu killilersuutit atuuttut malinneqassapput, tamannalu isumaqarpoq inuit 100-innaat illup iluaniissinnaasut.

Kommunimi illoqarfiit amerlanersaanni tamanna ajornartorsiutaanngilaq, Nuummili piffissat ilaanni qinersiffiusumi inuit 100-nit amerlanerusut isersimasarnerat nalinginnaasuuvoq. Ajornartorsiulli tamanna aaqqiivigineqarpoq qinersineq Inussivimmut nuutinneqarmat, inerujussuarlu tallimanut aggulunneqarluni, periuserlu taanna Corona-stabimit akuersissutigineqarmat. 

”Qinersisartut inuuimmik ullua tunngavigalugu nerrivinni qinersinermi allagartaq tigussavaat. Tamanna pereerpat qinersisartut ininut agguaanneqassapput, tassani qinersinerit ataasiakkaat qinersiffigissallugit. Inini ataasiakkaani inuit amerlanerpaamik 100 qaangissanngilaat, taamaasilluni silataani kinguleriaattoqassanani”, allatseqarfimmi pisortaa Christina Heilmann Rasmussen oqarpoq.

Qujanartumilli ullormi qinersiffiusumi silami siuleriiaani utaqqillutit qiulerusunngikkuit, qinersileruit allatut aamma iliorsinnaavutit.

”Allakkatigut qinersisoqarnissaa kaammattuutigaarput, innuttaasunik kiffartuussivimmi  imaluunniit illoqarfimmi pisiniarfiit ilaanni qinersivinni”, Christina Heilmann Rasmussen oqarpoq.