Nuuk Snow Festival 2021-mi apummik ilusilersuinermi unamminerni ajugaasut nassaarineqarput.
Sapaammi ualikkut sila anoreqarnani alianaappoq. Apummik ilusilersukkat arfineq pingasut assigiinngeqisut kusanaqisullu takussaaput. Ilusilersuinermilu unammisimanermut ajugaasimasut takkussimasunut qilanaaqisunut Nuutoqqami suaarutigineqalerlutik.
Suaarutiginnginnerani Borgmesteri Charlotte Ludvigsenip festivaalip Nuummut iluaqutigisai oqalugiarluni eqqaavai.
“Festivaali avammut nunanut allanut inuiaqatigiittut illoqarfittullu nittarsaattarpaatigut, uannullu una pingaarnerpaavoq, innuttaasugut ataatsimoortittarmatigut,” Borgmesteri oqarpoq.
Oqalugiaatini naammassimmagu ajugaasunik aalajangiisussanut aquut tunniuppaa.
Ajugaasullu tassaaput:
Ajugaasut: Team BALKKAN
”Unity isumaqarpoq ataatsimoorneq. Iligiinnitsinnut tulluarpoq pissutigalugu sanannittuusugut aappariit pingasuugatta. Qallunaat ajoqersuartortut kalaallillu naapeqqaarsimanerata ukiut 300-rujunngorsimaneranut aamma oqaaseqartuuvoq. Atavugut, ilaanni atanerput unamminalaarsinnaasarpoq ilaannilu nuannertarluni,” ajugaasut Team BALKKAN oqarput.
2-ngortut: Baby it’s cold outside
2-ngortut tassaapput iligiit Baby It’s cold outside suliaallu Sans Titre (qulequtaqanngilaq). Suliap silataata iluatalu assigiinngissusaat ersersippai. Silataa maniilakuluttoq iluatalu ilusaa manissoq iserfigineqarsinnaasoq. Tassani apummik ilutsit iluliumasut qatiingasullu takuneqarsinnaaput.
3-ngortut: Grønlands veteraner
3-ngortut tassaapput sakkutuuiarnerit peqatigiiffiat, taakkulu suliaat kalaallit qallunaallu sakkutuusimasunut nersornaatitut suliaavoq. Suliap ilamernga sukkutuuiarnerit nunatsinni sumiinneri ersersippai. Qallorfigineqarsinnaallunilu sisoorfigineqarsinnaasutut suliaavoq.
Eqqumiitsuliortut qinigaat: Team multivitamin
Eqqumiitsuliortut qinigaat peqataasuniik qinigaavoq. Qinigaasorlu tassaavoq Team Multivitamin-ikkut sanaavat ”Et eventyr” (oqaluttualiaq). Suliap tunngavia tassaavoq Qeerlutuuararnaq, ilusilersukkami qussuk atuakkamiit anillattoq, qulleq, H.C. Andersennillu nasaa takuneqarsinnaalluni.
Isiginnaartut qinigaat: Team Bims
Isiginnaariat ajugaatitaat tassaaput Team Bims-ikkut suliaat Antropocene. Suliaq isiginaartitsisarfittut ilusilersugaavoq. Pinngortitap inuillu ilusilersuisarnerat malillugit ilusilersugaq. Isiginnaartut ajugaatitaat Facebookkikkut qinersinermi nassaarineqarpoq.
