Nuutoqqami festivaali aallartilluarpoq, apummilu ilusilersugassat arfineq pingasut ulluni qaninnerni eqqumiitsuliarineqassallutik
Anori tamakkiisoq ammaanersiornermut takummaasunut qiiatitsilaaraluartoq eqqumiitsuliortussat qungujulallutik apummik suliassaminnik pinngortitsinissaminnut assut qilanaarput.
Kommuneqarfik Sermersuup kultoorikkut nittarsaasuat, Ujarneq Fleischer, festivalip ammaanersiornerani oqaluttuarpoq.
“Qulaaluanik ukioqarallarama Nuuk Snow Festivalip pinngoqqaarneraniik assut alutorisimavara. Ilasi nalusimajunnanngilaat eqqumiitsuliaq illoqarfiup qeqqaniitoq, Amisut¸festivalimi eqqumiitsuliaq tunngavigalugu pinngortinneqarnikuusoq. Apummik eqqumiitsuliap piviusunngortivissinnaanera peroriartorninni assut uannut sunniuteqaqataasimavoq,” Ujarneq oqaluttuarpoq.
Nuuk Snow Festival arfersaneq marlussaat ingerlanneqarpoq. Festivali 1994-imi aallarnisarneqarsimavoq, 2009-llu tungaanut ukiut tamaasa ingerlanneqarsimariarluni ukiut qulit ingerlanneqarsimanngilaq. 2019-imilu Nuuk Snow Festival ukiumoortumik ingerlanneqartalersimalluni.
