Coronamik ajornartoornerit Nuup alliartorneranut ajoqusiinngillat. Ullumikkut, februaarip ulluisa sisamaanni Nuuk 18.803-nik innuttaqarpoq. Innuttaasut siorna ullormit tassannga 475-inik amerlanerupput. Tassa innuttaasut 2,6 procentinik amerleriarsimapput.
Kommuneqarfik Sermersuumi Borgmesterip Charlotte Ludvigsenip kisitsisit pitsaasumik tupaallassimaarutigai.
”Corona pillugu killilersuutit alliartornerput killilissagaat naatsorsuutigisimagaluarparput, siornali marsimi nunatsinnut iseqqusaasoqannginnerani Nuummi innuttaasut suli amerleriarsimapput. Periusissiaq eqqortoq, tassaasoq illoqarfiit pingaarnersaannik amerlasuut najugaqarfigerusutaannik pilersitsineq toqqarsimagipput tamatuma takutippaa, Charlotte Ludvigsen oqarpoq.
Nuummi suliffeqarfiit ukiut kingulliit sulisussaaleqimmata, innuttaasut amerliartornerat nutaarsiassatsialaavoq. Taamaammat inuit amerlanerulernerat pisortanut namminersorlutillu inuussutissarsiortunut aningaasaqarnerup pitsaanerulerneranik isumaqarpoq.
”Inuussutissarsiortut sulisunik pisariaqartitsipput atugarissaarnerulernissatsinnullu akissaqassagutta Kalaallit Nunaanni pisortat inuussutissarsiortut akileraarutaatigut isertitanik pisariaqartitsipput. Taamaattumik Nuummi innuttaasut amerliartornerat nunatsinnut nutaarsiassatsialaavoq” Charlotte Ludvigsen oqarpoq. Innuttaasut sukkasuumik amerliartornerisa inissianik sanaartornerup sukkatsisarnissaa pisariaqalersikkaa ilutigalugu oqaatigaa.
”2016-imit 2019-imut pisortat inissiaataannik nutaanik 500-nik pissarsivugut, 2020-mili Namminersorlutik Oqartussat inissianik nutaanik pissarsinissamut periarfissagut unitsippaat, tamannalu ajornartorsiutaavoq. Pissutsinut ukiut 15-it matuma siorna atorsimasatsinnut utertitaassagutta, Nuummi ilaqutariinnut ataatsinut illut ataasiakkaat taamaallaat sanaartorneqarneranni, isumaginninnikkut ajutoorluinnartoqassaaq”, Charlotte Ludvigsen oqarpoq.