Services

Bormesterip tullersortaata aappaa innuttaasunik ataatsimiititsivoq

Marlunngormat januaarip ulluisa 19-ianni Kommuneqarfik Sermersuup ukiumut 2021-mut missungersuutaa Tasiilami innuttaasunut saqqummiunneqarpoq.

Borgmesterip tullersortaata aappaata Harald Bianco innuttaasunik ataatsmiititsinermi qaaqqusisuuvoq, Gert Ignatiussenilu ataatsimiinnermi aqutsisuulluni. Innuttaasut tusarnaariarlutik peqataasut 20-t apeqqarissaarluarput.

”Unnuk ingerlalluaqaaq, aamma ataatsimiinneq tunumiusut ingerlanneqarnera amerlasuunut iluarisimaarneqarpoq”, taama oqarpoq innuttaasunut ataatsimiititsinermi peqataasoq Marie Hiemer.

Tasiilami inissianik sanaartornissat, Kuummiuni ivigaasaaqqanik arsaattarfiliornissaq kiisalu utoqqaat illussaat nutaaq suliniutaasut ilaatigut saqqummiunneqarput. Tasiilami Paamiunilu inissianik sanaartornissamut ukioq 2024-ip tungaanut aningaasat 32,5 million koruunit Kommuneqarfik Sermersuumi immikkoortinneqarsimapput.

Tasiilami innuttaasut utoqqartaanut atugassarititaasut siunissami aamma qulakkeerneqarnissaat anguniarlugu utoqqaat illussaannik nutaamik pilersitsisoqassaaq. Taamaatuttaaq anaanap-meeqqallu illuannik pilersitsisoqarnissaanut aningaasat 12,6 million koruunit sulisunut ingerlatsinermullu atorneqassallutik.

”Illoqarfitsinnut pilersaarutit tusarlugit iluaqaaq. Illoqarfimmi susoqannginnerannik isumaqartut amerlaqaat, kisianni innuttaasunik ataatsimiititsinermi aningaasat sumut atorneqarnissaannik pilersaarutinillu saqqummiinerit paasisaqarluarnaqaat”, Marie Hiemer taama oqarpoq.

Kommunalbestyrelsemi ilaasortat, Knud Mathiassen IA-meersoq aammalu Mala Høy Kuko Siumumeersoq innuttaasunik ataatsimiititsinermi aamma peqataapput, taakku borgmesterip tullersortaata aappaa Harald Bianco peqatigulu apeqqutit assigiinngitsut innuttaasuniit apeqqutigineqartut akissuteqarfigisarpaat.