Naalakkersuisunit inatsisissatut siunnersuut nutaaq kommunit siuariartornissaannut akornusiissaaq
Missingersuutit pillugit inatsisissami nutaami Naalakkersuisut kommunit aningaasatigut ajornartorsiortinnerulissavaat. Inatsisissatut siunnersuummi kommunit aningaasartuutaasa amerlanerpaamik ukiumut procentimik ataasiinnarmik amerlanerpaamillu ukiut sisamat ingerlanerini procentinik marlunnik qaffattarnissaat aalajangiusimaneqarpoq. Kommuneqarfik Sermersuumut tunngatillugu innuttaasunik sullissineq ingerlaannartumik ajorseriaateqassaaq.
”Ukiuni amerlanerpaamik innuttaasut amerlassusaat procenti ataatilaarlugu amerleriaateqartarput. Aningaasartuutit innuttaasut amerlassusaannut malinnaanngippata, innuttaasunik sullissinitsinni aningaasartuutinik ikilisaasariaqarneq periarfissatuaraarput”, Kommuneqarfik Sermersuumi borgmesteri Charlotte Ludvigsen oqarpoq.
Missingersuutit pillugit inatsisissap kingunerissavai Kommuneqarfik Sermersuumi nalinginnaasumik ingerlatsinermut tunngasunik ikilisaasariaqalernissarput, aammalu suliassaqarfinni soorlu meeqqanik paarsinermut tunngasuni, atuarfinni, inuttut ajornartorsiutilinni attaveqaqatigiinnermullu tunngasuni aningaasaliissuteqarnissat tamarmik killeqartinneqalernissaat. Taamaattumik siunnersuut ineriartornissamut unitsitsissaaq.
”Ukiut tamaasa suliatsinnik pitsaanerusumik naammassinnittarnissarput innuttaasutta naatsorsuutigisarpaat. Uanga nammineq aamma taamaappunga. Politikkimik suliaqalerninnut pissutaavoq innuttaasut atugarisaannik pitsanngorsaaqataaniarama, kisianni pissutsit taamaannerisa pinngitsaalisaassummik akuersaaginnartariaqarpasippavut”, Charlotte Ludvigsen oqarpoq.
Sermersuumi-borgmesterip inatsisissaq nunatsinni kommunit annersaanni sullissinermut ineriartortitsinissamullu taamak kinguneqarnerlutsigisussaq sooq saqqummiunneqarnersoq eqqumiigaa.
”Allaanngilaq inatsisissatut siunnersuut Naalakkersuisut illoqarfiit pingaarnersaannik allatut iliorlutik akiuunnerat. Kommunit ineriartortut siunnersuut aqqutigalugu ajornartorsiortinneqarnerulissutigissavaat, kommunilli qimanneqartartut kisimik iluaquserneqassallutik. Allaanngilaq Naalakkersuisut siunnerfeqarlutik innuttaasutsinnut pillaaniartut”, Charlotte Ludvigsen oqarpoq.