Persida Lund Nuummi 1935-mi septembarip 23-ani inunngorpoq, ineriartorfiujuartumillu inuuneqareerluni ukioq manna 85-inik ukioqarluni novembarip 28-ani toqukkut qimaguppoq. Ukiuni 67-ini uini, ernini kiisalu ernutat 5 aamma ernutaqqiutit 14 qimappai.
1981-imi Persida Lund ikaartiterisartutut ilinniarluni aallartippoq, 1987-imilu naammassilluni. Hans Lyngep qalipagai ikaartitanngorlugit Kommuneqarfik Sermersuup (Taamani Nuuk Kommuniata) ataatsimiittarfiani nivinngarneqartussanngormata aallaqqaataaniilli peqataasimavoq. ”Fangeren vender hjem” kiisalu ”Den sidste trommesang” Hans Lyngemit qalipanneqarsimasut ikaartiterneqarlermata ikaartitereqataasimavoq. Inuit allat assilisaat najoqqutaralugit arlalinnik ikaartiterisarsimavoq, soorlu Østre Landsretimut ”Søndre Igaligo Fjord” Kistat Lundip qalipagaa najoqqutaralugu suliarinikuuaa kiisalu ”Hvalerne” aamma ”Ulven og Haren” Jens Rosingip assilialiai najoqqutaralugit ikaartiternikuullugit.
Persida Lund kalaallini siullersaalluni ikaartiterisunngunngikkallarama assigiinngitsorpassuarnik suliaqartarsimavoq. Persida atorfeqarnera ineriartorfiujuarsimasoq 1950-imi aallartippoq, taamani 15-inik ukioqarluni kigutilerisumut Valborg Albrechtsenimut kiffanngorami. Ilaqutariinnut aqqutissiuisutut, peqqinnissaqarfimmi nutserisutut aammalu Kalaallit Nunaanni niuertarfik namminersortoq siullersaanni pisiniartitsisutut ukiorpassuarni atorfeqarnermigut ilaatigut suliffigisimavai.
Persida Lund inuunini tamaat inunnik sullissilluni sulivoq, socialmedhjælperiulluni suliaminik pikkorinnerusulerluni ilaqutariinnut aqqutissiuisutut Danmarkimi ilinniassalluni aalajangersimavoq.
Taamani nunatsinni inulerinermut ilinniarfimmik peqanngilaq, taamaammallu kalaallit ilinniarnertik Århusimi Børnehaveseminariummimi ilinniariartarput. Taamaasilluni Persida ilaqutariinnut aqqutissiuisutut ilinniartilluni kalaallit meeqqerisunngorniartut Århusimiittut aamma ilinniartitsisuuffigisarsimavai, ilinniartitsineq kalaallisut ingerlattarlugu.
Aqqaluup Aneerasaartarfiani meeqqerivik imminut pigisumik pilersitsinissamut aamma peqataalluinnarsimavoq. Paaqqinnittarfiit imminut pigisut 1963-imi Danmarkimi pikkorissartilluni tusaqqaarsimavai, atuakkiaminilu ima allappoq;
”Taamani eqqarsarpunga ernutartaassajunnarsilluta, taamaammat meeqqerivimmik taamaattumik pilersitsissalluni isumassarsiatsialaavoq.”
Taamaasilluni aningaasanik nakkakaatitsivimmik Oles Varehusimi pisivoq, arnallu allat peqatigalugit ataatsimiinnernut (Husmoderforeningen) nakkakaatitsivik nassartalerlugu. Husmoderforeningemi arnat allat peqatigalugit tigulluarneqaqisumik unnukkorsiortitsisalerput. Ukiut tallimat qaangiummata, 1968-mi meeqqerivik Aqqaluup Aneerasaartarfiani ammarneqarpoq.
Dansk Kvindesamfundip nunatsinni immikkoortortaqalernissaanut Persida suliniuteqassasoq kajumissaarneqarsimavoq. Tamanna amerlasuunit pisariaqanngitsutut isigineqarsimavoq, tassami peqatigiiffiit (Husmoderforeningen) pioreermat. Taammaammallu peqatigiiffiup taajuutaa allanngortinnissaanik, pissutsinut nutaanut tulluarnerusumik taajuuteqalernissaa sulissutigilerlugu. Naggataatigullu tamanna iluatsippoq, arnat peqatigiiffii kattussuunneqarmata Arnat Peqatigiinnik (Kvindeforening) taajuuserneqarmat.
Persidap aqqa qanoq isumaqarnersoq oqaluttuarfigineqarsimavoq ”Malersuisoq, nikallujaatsoq, ingerlarsortoq kiisalu pinertooq. Eqqortuusut oqaatigisariaqarput.
Persida Ane Rebekka Dorthie Lund ikaartitikkani kusanartunik tuninikuuaatigut, taakkuunnaanngillalli. Maligassiuisuuvoq – arnaq nukittooq – kiisalu sanerlersuukkuminaatsumik inuit pillugit sulilluartuulluni.
Persida Lund eqqaaneqarnera ataqqinartuuli
Kommuneqarfik Sermersooq