Innuttaasunut

Tasiilami illoqarfimmik ineriartortitsinermi mittarfiliortoqartariaqarpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersooq kommunimi illoqarfinnut nunaqarfinnullu siunissaq ungasinnerusoq isigalugu pilersaaruteqarpoq. Kommune annertuumik iliuuseqarsinnaavoq, taamaattorli Naalakkersuisut aamma akisussaaffeqarfigaat, Tasiilamilu ineriartorneq ingerlaannassappat mittarfittaartariaqarpoq.

Ukiuni kingullerni qulini partiit isumaqatigiissuteqartuusut illoqarfinnik nunaqarfinnillu ineriartortitsinermut atugassanik 70 mio. koruunit pallillugit aningaasaliissutigisimavaat. Assersuutigalugu 8 mio. koruunit, 2021-mi kommunip nunaqarfiini isaterinermut, iluarsartuussinermut, aserfallatsaaliuinissamut aamma nutaanik sanaartukkanik atugassatut missingersuutigineqarput, soorluttaaq Paamiuni asfalterinissaq qulakkeerneqartussaasoq.

Tunumi Internet pitsaanerusoq

Partiit isumaqatigiissuteqartuusut ukiumut, 2021-miit ukiunilu 4-ni tulliuttuni ukiumut 5 mio. koruunit immikkoortippaat, Tunumi illoqarfinni nunaqarfinnilu internetikkut attaveqarnerup ullutsinnut naleqqunnerulernissaanut pitsaanerulernissaanullu qulakkeerinnissutissat. Taanna pillugu qaammataasamik nutaamik pisinissamut kommune Tele Greenlandimik suleqateqarluni aallartippoq.

”Soorlu naluneqanngitsoq Tunumi interneti arriitsuararsuuvoq, taamaammat tamatuma aaqqiivigineqarnissaa pingaaruteqarpoq, tamannalumi maanna iliuuseqarfigivarput, borgmesteri Charlotte Ludvigsen isumaqatigiissuteqarnermut nuannaarutiginnittoq oqarpoq.

Mittarfik kissaatigisani pingaarnerpaaq

Kommuneqarfik Naalakkersuisunut kaammattuuteqarpoq, Tasiilami mittarfiliortoqassasoq, tassami Tunumi illoqarfiit pingaarnersaata siunissami ineriartortitsinissamut pitsaasunik atugassaqartitsisoqassappat tamanna pisariaqartimmagu.

”Illoqarfiup qanittuani mittarfiliornissamut suli aalajangiiffigineqanngitsuni Nunatsinni illoqarfiit annersaraat. Tasiilap tikikkuminarnerunissaa kissaatigaarput, ullumikkummi tappanna Nunatta sinneranut nunanullu allanut sanilliullugu avinngarusimalluinnartumiippoq. Illoqarfik mittarfittaarpat soorunami innuttaasunut illoqarfimmullu iluaqutaassaaq, tamannami kissaatigisatsitut inuiaqatigiinnut atugarissaarnissamullu ilasaataassaaq. ” Justus Hansen oqarpoq.