Services

Sermersooq ombudsmandenimut isumaqataanngilaq

Kommuneqarfik Sermersuumi Aningaasaqarnermut Ataatsimiititaq aalajangerpoq, Inatitsisartut ombudsmandianit peqqussut malinniarnagu.

”Inatsisartut ombudsmandiata sulineranut nalinginnaasumik annertuumik ataqqinnittaraluarpugut, matumanili isumaqarpugut suliaq eqqortumik suliarisimallugu, taamaattumillu ombudsmandip aalajangiisimaneranut atatillugu eqqartuussivimmut suliassanngortitsineq aqqutiginiarlugu”, Suliffeqarnermut Isumaginninnermullu Ataatsimiititami siulittaasoq Inge Olsvig Brandt oqarpoq.

Kommuneqarfik Sermersuumi Kommunalbestyrelsimut 2014-imi paasinarsivoq, Nunatsinni isumaginninnermi ikiorsiissutitigut qaffasinnerpaalluta, kingunerisaanillu pisortanit ikiorsiissutisisartut amerlasuut inissaqareernatik Nuummut noorarsimasut. Tamatuma kingunerisaanik pisortanit ikiorsiissutit 2015-imi appartinneqarput. Ikiorsiissutillillu taakku ilaat ombudsmandimut naammagittaalliuteqarpoq.  Suliami matumani qitiusoq tassaavoq ikiorsiissutit appartinneqarnissaannut atatillugu ikiorsiissutisisartut siumut aamma eqqortumik ilisimatinneqarsimanersut pillugu apeqqut.

”Suliamut tassunga tunngatillugu isumaqarpugut inatsisit naapertorlugit iliuuseqarsimalluta, tamatumunngalu inatsisitigut siunnersortigisarput isumaqataavoq”, Inge Olsvig Brandt oqarpoq.

Inatsisartut ombudsmandiata naammagittaalliuteqartunik ikiuunniarluni nammineq aningaasartuutissarinngisamik eqqartuussivikkut suliassanngortitsinissamik qinnuteqarluni siumut nalunaarutiginikuummagu suliamut tunngasumik Kommuneqarfik Sermersooq maannakkorpiaq oqaaseqarsinnaanngikkallarpoq.

Suliaq Aningaasaqarnermut Ataatsimiititamit ulloq 12. novembari 2020 oqaluuserineqarpoq. Siumut ataatsimiititami ilaasortaatitai marluusut aalajangiinermut isumaqataanngillat