Services

Ineqarnermut tunngasoq: Naalakkersuisut amigartooruteqarlutik attartortitsisarput

Namminersorlutik Oqartussat ineqarnermut ilusilersueriaaseq, Kommuneqarfik Sermersuup saassutarineqassutigisaanik, namminneq atorpaat.

Oqartussaasut namminersortunik inissianik attartuisinnaatitaappata, taamaaleriarlutillu annaasaqaatigalugu attartorteqqillugit?

”Taamaaliorsinnaavugut, allalli taamaaliorsinnaanngillat”, taamatut Naalakkersuisut isumaqarpasipput. Naalakkersuisut Kommuneqarfik Sermersuup Nuummi innuttaasunut ilusilersueriaaseq atorlugu 416-inik inissianik pissarsisimaneranut Nakkutilliisoqarfimmut nassiusseriarlutik, § 37 naapertorlugu apeqqummut akissutip takutippaa Namminersorlutik Oqartussat, sulisunut inissianik pissarsiniarlutik namminneq taamaaliortartut.

Akissummi, Peqqissutsimut Naalakkersuisup Anna Wangenheimip akissutaani, peqqinnissaqarfik ilaatigut attartornermut, attartortut akiliutigisartagaannit, pingasoriaammik akiliisartoq takuneqarsinnaavoq. Ineqarnermut tapiissummut tunngavilersuutigineqarpoq Peqqinnissaqarfimmut sulisunik atorfinitsitsinissamut pisariaqartinneqartoq.

”Peqqinnissaqarfimmi sulisoqarnissaq qulakkeerneqartariaqartoq isumaqataaffigaara, kisiannili Nuummi annertuumik inissianik amigaateqarnerup aaqqiivigineqarnissaa aamma pingaaruteqarpoq. Naalakkersuisut ilusilersueriaaseq nammineq atugartik uatsinnut inerteqqutigigaat uannut paasiuminaappoq”, Kommuneqarfik Sermersuumi borgmesteri Charlotte Ludvigsen oqarpoq.

Akissummi aamma ilisimatitsissutigineqarpoq Naalakkersuisut sulisunut inissiat amigaataasut iliuuseqarfiginiarlugu sulisunut 60-inik inissialiornissaq pilersaarutaasoq. Tamanna Kommuneqarfik Sermersuumi borgmesterip nuannaarutigaa, aappaatigullu tupigalugu.

”Isumaqatigiigunarpugut inissianik amigaateqarneq inuiaqatigiinni annertuumik ajornartorsiutinik pilersitsisuusartoq. Taamaattumik ajornartorsiutip aaqqiiviginissaanut sooq Naalakkersuisut kommuninik ujartueqatiginnikkumannginnersut paasisinnaanngilara. Tassami tamanna innuttaasut politikerinit naatsorsuutigisariaqaraluarpaat”, Charlotte Ludvigsen oqarpoq.

Naalakkersuisut peqqinnissaqarfimmi sulisunut inissialiornissamut 2022-miit ukiumut 3 millionit koruunit immikkoortissimavaat.