Kommuneqarfik Sermersuumi 2021-mi Missingersuutit Inuit Ataqatigiit, Demokraatit aamma Suleqatigiissitsisut akornanni isumaqatigiissutigineqarput. Ineriartortitsineq aatsaat taama pingaaruteqartigaaq Missingersuutinik isumaqatigiissuteqartut COVID-19-imik nalaataqarneq pissutigalugu sipaaruteqartoqannginnissaa isumaqatigiissutaavoq. Annertuumik sanaartornissamut pilersaarut inuiaqatigiit unittuunnginnissaannut pakkersimaarutaassaaq.
Ukiormanna missingersuutinik isumaqatigiissuteqartut aammaarlutik annertuumik siumullu isigisumik sanaartornissamut pilersaarusiorput kommunimi ingerlaannartitsisussanik. Ineriartortitsinermut tunngavik unikkaluarpat inuiaqatigiinni aningaasaqarneq unissaaq, taamaalillunilu suliffeqarfiit akiliisinnaajunnaarnissaat aarlerinarnerulerluni.
– Nunarsuaq tamakkerlugu tunillaassuunneq ingerlaaraluartoq unittuunnginnissarput kommunitsinnut pingaaruteqarluinnarpoq. Nalaatatsinnit aniguiffissarsissaagut, taamaalillunilu aningaasaqarnerput – taamalu kiffartuussinerput inuunerpullu ajorseriaateqannginniassammat. Una sanaartornissamut pilersaarut tunngavigalugu suliffeqarfiutiVut – taamalu ineriartornerput – attatiinnarnissaat qulakkiissavavut, Justus Hansen nassuiaavoq.
Aningaasaqarnikkut sipaaruteqarniarluni politikKeqarneq pissutigalugu akiliisinnaajunnaartoqassagaluarpat, missingersuutinik isumaqatigiissuteqartut isumaqarput, suliffissaaleqisut amerlissasut kingunerisaanillu ilaqutariit ingerlanerliulissapput. Tamanna pinngitsoortinniarlugu 2021-mut sanaartornissamut pilersaarutinut 300 mio. immikkoortinniarlugit isumaqatigiissutigineqarpoq.
Tassa kommunimi missingersuutit katillugit 15 procentiisa naligaat.
– Tamanna pingaaruteqarluinnartoq pillugu missingersuutinik isumaqatigiissuteqartut ataatsimoorullugu isumaqatigiissutigisinnaagaat nuannaarutigaara. Ingerlaannarnissarput anguniassavarput – maannakkut meeqqatsinnut ilaqutatsinnullu, pingaartumilli innuttaasutsinnut siunissamut periarfissat qulakkeernissaat ingerlattuassavarput, borgmesteri Charlotte Ludvigsen oqarpoq.
Missingersuutinik isumaqatigiissuteqartunut suliffissaqarneq, ilinniarneq ilaqutariillu atugarissaarnissaata qulakkeerneqarnissaa pingaaruteqarluinnarpoq. Ilaqutariit inuuniarnerat pitsaasuugaangat kingunerisaanik isumatusaartumik atuineq pilersarpoq, taamaaliornerlu inuussutissarsiutini suliffeqartitsivoq. Taamaalilluni akileraarutitigut isertitat qularnaarneqassapput, taakkulu pitsaanerusumik atugaqalernermik nutaanillu paaqqutarinnittarfinnik inissianillu pilersitsinermik kinguneqartarput.
– Ingerlatsiinnarnissarput COVID-19-illu nalaataqarnitsinni katataasoqannginnissaa pingaaruteqarpoq.
Naak nunarsuarmi tunillaassuuttoqaraluartoq peqqinnartumik patajaatsumillu inuuneqarnikkut kommunitsinni ineriartortitsinissamut siuariartornissatsinnullu najoqqutassat qulakkeersinnaalluarpagut, Michael Rosing oqarpoq.