Partiit isumaqatigiissuteqartut isumaqatigiipput: 2021-mut missingersuutit imatut isikkoqassaaq
Partiit missingersuutinik isumaqatigiissuteqartut Inuit Ataqatigiit, Demokraatit aamma Suleqatigiissitsisut partiiat Kommuneqarfik Sermersuumi 2021-mut missingersuutit qanoq isikkoqarnissaat isumaqatigiissutigivaat. Kommunimi tamarmi inissiat amerlanerusut, sunngiffimmi sammisassat tassungalu atortut salliunneqarnissaat aammalu ilaqutariinnut inuuniarnermikkut ajornartorsiuteqartunut tapersersuinissaq 2021-mi pitsanngorsaatigineqaqqittussat pillugit suliniuteqarfissatut partiit isumaqatigiissuteqartut isumaqatigiissutigisaasa ilaminiinnarivai.
Partiit Inuit Ataqatigiit, Demokratit aamma Suleqatigiissitsisut partiiat Kommuneqarfik Sermersuumi aningaasat 2021-mi qanoq agguataarneqarnissaat pillugu isumaqatigiipput. Tamanna ullumi tallimanngornermi oktobarip 23-ani isumaqatiginninniarnerup kingorna ersersinneqarpoq. Missingersuutinik isumaqatigiissuteqarneq Kommunalbestyrelsip ataatsimiinnissaani tulliani ulloq 24. novembarimi pisussami aamma saqqummiunneqassaaq.
Kommunalbestyrelsimi partiit tamarmik ulloq isumaqatiginninniarfik sioqqullugu marloriarlutik isumaqatiginninniarnermut aggersarneqarput, tassani partiit tamarmik aamma aggersarneqarput. Matumani Siumut isumaqatiginninniarnermut peqataajumanani aalajangersimavoq.
– Assorsuaq nuannaarutigivara uagut – partiit isumaqatigiissuteqartut akunnitsinni – 2021-mut missingersuutissanik isumaqatigiissuteqarsinnaagatta. Partiit tamarmik suliniutiminnik aamma isumaqatiginninniarnermi ataatsimoortumik aaqqiissuteqarniarnermut piumassuseqarnerat pillugu qutsavigineqassapput, borgmesteri Charlotte Ludvigsen (IA) oqarpoq.
Missingersuutit imatut agguataarput
2021-mi Kommuneqarfik Sermersuumi ingerlatsinermut 2 milliardit koruunit missingersuutiginiarneqarput, sanaartugassanullu 300 millionit koruunit. Akileraarutip procentia allannguuteqassanngilaq, sinneqartoorutissallu 60 millionit koruuniupput. Taakku saniatigut, partiit isumaqatigiissuteqartut missingersuutini suut isumaqatigiissutigineraat naatsumik paasisaqarfigisinnaavatit.
Ineqarnissamut pisinnaataaffik
Missingersuutinik isumaqatigiissuteqarnermi nammineq ineqarsinnaatitaaneq assut pingaartinneqarpoq. Ukiuni tulliuttuni 6-ini kommune inissianik ikinnerpaamik 1.850-inik kommunimi tamarmi pilersitsiniarpoq. Ilaatigut tassani inuusuttut, ilaqutariit utoqqaallu pitsaanerusumik periarfissaqartinnissaat pineqarpoq aammali angerlarsimaffeqanngitsut allatullu pisariaqartitsisut aamma isiginiarneqarput. Missingersuutini aamma inissiaareersut nutarterneqarnissaannut nutaanillu pilersitsinissamut aningaasaliinerit takuneqarsinnaapput.
Sunngiffimmi periarfissat
Kommunimi kulturimik aamma sunngiffimmi soqutigisalinnut nutaarsiassatsialaqarpoq. Partiit isumaqatigiissuteqartut kulturip aamma sunngiffiup pitsaanerusumik periarfissaqarnissaat isumaqatigiissutigivaat. Tassani suliniutissat amerlanerusut aallartinneqarnissaat pineqarpoq. Ilaatigut Nuummi Illorsuaq Timersortarfik, siunissami multihusinngortinneqartussaq, ilaqutariinnut, timersortartunut aamma nammineq piumassutsiminnik ingerlataqartut inissisimaffigisinnaasaat allilerlugu aallartinneqassaaq.
Taassuma saniatigut suliniut Arctic Park aallartinneqassaaq. Sisorartartunut majuartaat nutaaq, qamuteralannut ingerlaarfiit, mountainbikertartunut ingerlaarfiit aqqusineeqqallu Quassussuup Kuanninnguillu akornanni pilersinneqassapput. Tamakku timersortartunut, ilaqutariinnut pinngortitamillu nuannarisalinnut kiisalu takornarianut orniginartitsissapput, Isikkivimmiillu isikkivigissuarmik misigisaqartoqarsinnaavoq. Partiit isumaqatigiissuteqartut pilersaarusiornerup aallarnisarneqarnissaanut aningaasanik immikkoortitsisoqarnissaa isumaqatigiissutigivaat.
Sunngiffimmi klubbit nutaalianut malinnaatinneqassapput
Partiit isumaqatigiissuteqartut inuusuttut kissaataat, takorluugaat pisariaqartitaallu eqqarsaatigalugit sunngiffimmi klubbit nutaanut malinnaatinneqarnerusariaqarnerat pillugu isumaqatigiipput. Taamaattumik neqeroorutigineqartut inuusuttut soqutigisaannut annertunerusumik sammitinneqassapput – sunngiffimmilu klubbit inuusuttut soqutigisaannut malinnaanissaminnut annerusumik iliuuseqassapput. Qinngutsinni sunngiffimmi klubbeqalernissaa aammalu nipilersornermik ilinniarfiup Nuummi Mikimut ataatsimoortinneqarnissaa partiit isumaqatigiissuteqartut isumaqatigiissutigivaat. Sumiiffiup inuusuttut inersimasullu nipilersornermik uummammiullit katersussavai.
Ilaqutariit tunngasut aallunneqaannassapput
Partiit isumaqatigiissuteqartut inuunermi toqqissisimasuunissaq inuit tamarmik pisinnaatitaaffigigaat aamma meeqqanut ilaqutariinnullu tunngasut sipaarniuteqarfigineqassanngitsut isumaqatigiissutigivaat. Sipaarniutit allat inuiaqatigiinni sanngiitsortatsinnik eqquissanngillat. Taamaattumik partiit isumaqatigiissuteqartut ilaqutariinnut tunngasunik suliniutit pitsanngorsarneqarnissaat aalajangiuppaat. Partiit isumaqatigiissuteqartunit Tasiilami meeqqap-anaanap illuata ingerlanneqarneranut 3,15 mio. koruunit immikkoortinneqassasut isumaqatigiissutigineqarpoq. Taakku saniatigut partiit isumaqatigiissuteqartunit 3,4 mio. koruunit Tasiilami Ungecenterimik inunnut suliniutinik meeqqanut inuusuttunullu immikkut pisariaqartitsisunut tunngasunik katersuisussamik pilersitsinissamut atorneqassapput. Pilersaarut kingorna 2022-miit Paamiunut allineqarsinnaanngorlugu misiligutitut pilersinneqassaaq.
Ineriartortitsineq aatsaat taama pingaaruteqartigaaq
COVID-19 eqqarsaatigalugu ineriartortitsineq aatsaat taamma aalajangiisuutigaluni pingaaruteqartigisoq partiit isumaqatigiissuteqartut isumaqarput. Ineriartortitsineq unikkaluarpat inuiaqatigiinni aningaasaqarneq unittuussaaq suliffeqarfiillu tamatuma malittaanik akiliisinnaajunnaassapput. Taamaattumik partiit isumaqatigiissuteqartut 2021-mi sanaartugassanut 300 mio. koruunit sinneqartut immikkoortippaat. Taakku kommunip ataatsimut missingersuutaasa 15 %-it missigisai taamaasillutik suliffiit inuunerissaarnerlu qulakkeerneqassammata unittuunnginnissamut pissutaaqataassapput.