Coronap ajornartoortitsinera sakkortugaluartoq kinguneqarnerlulaaraluartorlu Kommuneqarfik Sermersooq 2020-p affaani siullermi ilimagisamit 69,9 mio kr.-nik sinneqartooruteqarpoq.
Ukioq manna ukiup affaanut siullermut naatsorsuutit Kommunalbestyrelsip akuersissutigeqqammerpai, angusallumi naammagisimaarnissaannut tunngavissaqarluarpoq.
Amerlanerit eqqaamagunarpaat COVID-19 tassanngaannarsuaq takkummat kommunimi – nunattalu sinnerani atuuffippassuit matunerannik kinguneqartoq.
Iliuuseqapallanneq
Taama immikkuullaritsigisumik pisoqarnerata kingornagut naatsorsuutit inernerisa amigartooruteqarfiunnginnerannut pissutaanerpaavoq kommunip tungaaniit iliuuseqapallattoqarnera.
Assersuutigalugu sanaartugassanut missingersuutinit 65,3 mio kr.-it nassaarineqarput, taakkunannga amerlanerit suliassanit kinguartitaneersuupput, pilersaarutit naapertorlugit kingusinnerusukkut naammassineqartussanit.
Aningaasatigut nangittumik ingerlasoqarpoq
Corona takkussimatsiaannartoq suliffissaaleqisut amerliallalaaraluartut, suliffeqarneq ataatsimut eqqarsaatigalugu isumatusaartumik qaangiilluartoqarpoq. Sulisussat amerlipput, akileraarutitigullu isertitat naatsorsuutigisamit amerlanerullutik.