Ukiut tamaasa Kommuneqarfik Sermersooq Angalanissamut Aningaasaateqarfimmiit agguaassisarpoq, aamma Coronamik ajornartoorneq peqqutaalluni unitsinneqanngilaq, taamaattoq innersuussutialuit allanngortinneqarput.
Aningaasaateqarfiup siunertaa tassaavoq sumiiffimmi ataasiinnavissuarmi inisseqqasarnerup kingunerinik nuanniissinnaasunik pinaveersaartitsineq aamma kommunimi innuttaasut nunarsuarmioqataanermik misigisimanissaannik siunertaqartumik Kalaallit Nunaani avataanilu innuttaasut angalarusunnermik kissaateqarnerannik piviusunngortitseqataarusussuseq.
Ukioq manna qinnuteqarsinnaaneq qaammammik ataatsimik sivitsorneqarpoq, nualluussuaq Corona peqqutigalugu, tassani qinnuteqarsinnaasut amerlanerit anguniarlugit.
Ukioq manna Angalanissamut Aningaasaateqarfimmut 570.000 koruunit immikkoortinneqarput, innuttaasut katillugit 70-it qinnuteqarsimapput, aningaasanngorlugit 1.4 millionit koruunit nalinginut.
Qinnuteqartorpassuaqarmat sukannersumik pingaarnersiuinissaq kingumut pisariaqarluinnarsimavoq. Kommuneqarfik Sermersuumi innuttaasut tamavimmik qinnuteqarnissamut periarfissaqarput, ilaqutariit meerartallit akissaatikinnerusullu ukiuni kingullerni tallimani angalaarsimanngitsut salliutinneqarputtaaq.
Angalanissamut Aningaasaateqarfiup siulersuisuisa qinnuteqaatit tamaasa peqqissaartumik suliarisarpaat. Qinnuteqartut 32-t akuerineqarput qinnuteqartullu tamarmik toqqaannartumik nalunaarfigineqassapput.
Siulersuisunit innersuussutigineqarpoq nunami angalasoqassasoq, pissutigalugu nunanut allanut angalanissat maannakkut killilersorneqarmata, aamma angalanissamut tapiissutit aappaagumut nuutsinneqarsinnaanngimmata.
Kommuneqarfik Sermersuumit tamassi feeriarluarnissassinnik kissaappatsigit.
Paasissutissat allat pillugit Angalanissamut Aningaasaateqarfiup siulersuisuani siulittaasoq Inge Olsvig Brandt mobilikkut attavigineqarsinnaavoq: 559896