Kommuneqarfik Sermersooq massakkut najukkani inuussutissarsiuteqartut Coronap malitsigisaanik ajornartoornermi qanoq ikiorserneqarsinnaanerinut periarfissaqarnersoq misissuivoq
Covid 19-ip siaruatsaaliorneqarneratigut massakkut Kalaallit Nunaata ilarujussua unitsinneqarpoq Nappaatip nunarsuarmi siaruarnerata aningaasaqarnikkut qanoq kinguneqarnissaa siumut oqaatigineqarsinnaanngilaq, aamma Kalaallit Nunaanni inuussutissarsiuteqartunut qanoq sunniuteqarnissaa eqqarsaatigalugu.
Massakkut Nuummi Kommuneqarfiup allaffiani borgmesteri Charlotte Ludvigsen suliffeqarfinnut aningaasaqarnikkut eqqorneqartunut ikiorsiissutinik aallartitsivoq.
”Allaffeqarfik qinnuigivara, akiligassat erngertumik akilerneqartassasut, akiliiffissatut killiliunneqartut nalinginnaasut utaqqeqqaarnagit, taamatut iliortoqarpoq nioqqutissanik pisiortorfiit piffissami nalorninartorsiorfiusumi aningaasaateqarnissaat qulakkeerumallugu”, Charlotte Ludvigsen oqarpoq.
Najukkami suliffeqarfiit ikiorumallugit kommunimit eqqarsaatigineqalerpoq, najukkami aningaasat suli kaaviiaartinneqarnissaat angujumallugu suliassat suut siuartinneqarsinnaanersut.
”Piffissami aggersumi aserfallatsaaliuinerit, suliffeqarfinni, atuarfinni illunilu allani suliassat pilersaarutaasut, aallartissavagut. Suliassat ukiumi matumani kingusinnerusukkut imaluunniit aappaagu pilersaarutaagaluarput, najukkamili inuussutissarsiuteqartut tapersersorumallugit taakkua aallartissavagut. Tamanna suliakkiissutit amerlavallaanngiffianni sanaartornermik ingerlatsisunut kommunimiittunut suliassaqartitsissaaq”, Charlotte Ludvigsen oqarpoq.
Inuussutissarsiuteqartut akornanni eqqugaanerpaat tassaapput eqqumiitsuliortut. Kommuneqarfik Sermersooq nunap sinnera assigalugu kulturimik aaqqissuussinerit tamaasa piffissami aalajangersimanngitsumi unitsitsivoq. Kommunip taarsiullugu qarasaasiakkut Facebook aqqutigalugu kulturikkut aaqqissuussinerit ingerlanniarlugit aalajangerpoq.
”Taamatut iliornitsigut innuttaasut kulturimik misigisaqartissinnaavagut taamatullu eqqumiitsuliortut arlallit isertitaqarsinnaapput”, Charlotte Ludvigsen oqarpoq.
Ilaatigut Danmark, USA aamma Tuluit Nunaat ataatsimut ikiorsiissutinik annertuunik aallartitsereerput, innuttaasunut suliffeqarfinnullu nunat tamat ajornartorsiorfianni ikiuutaasunik. Suliniutit soorlu akileraarutinik kinguartitsinerit Kalaallit Nunaanni atulissagaluarpat, tamanna nuna tamakkerlugu pisussaavoq, Sermersuulli borgmesteriata neriorsuutigivaa nammineq piareersimalluni sutigut tamatigut najukkami suliffeqarfiit qulakkeerneqarnissaat.
”Covid 19-ip tuniluunnerata unitsinnissaa qitiutilluinnaripput qularutigineqanngilluinnassaaq, taamaakkaluartoq aamma inuiaqatigiit nunarsuaq tamaat tuniluunnerup qaangiunnerani ingerlaannarnissaat qulakkeertussaavarput. Tamatta allatut ajornartumik kommuunitta suliffiuinnarnissaa