Ukiuni kingullerni Naluttarfik Malik-mi atuisut amerliartuinnavipput. 2017-imi naluttarfik 100.000-it missaannik isertoqarpoq, 2018-imi amerlisimapput 136.000-it missaannut, taavalu 2019-imi 136.000-init amerlanerit naluttarfimmut isersimallutik. Naluttarfiliartartut amerliartorneri ilutigalugu, Naluttarfik Malik – Dronning Ingridip Napparsimmavissua suleqatigalugu – nalunnguartarfinni bakteriaqalerneranik paasisaqarpoq. Taamaattumik Malik atuisut siunnersuisooqatigiivi suleqatigalugit aalajangerpoq imeq ullumikkornit pitsaanersumik salinneqartalissasoq. Tamanna pivoq bakteriaqaleqqinnissaa pinaveersaartinniarlugu, nalunnguariartullu pitsaasumik misigisaqartinnissaa pineqarluni.
Taamaattumik naluttarfik marlunngornikkut sisamanngornikkullu nal 06:00 – 08:00 matoqqasassaaq.
– Imeq ullaakkut salikkaangatsigu, erngup pH-værdiata malunnartumik pitsanngoriartornera takusinnaasarparput. Aamma peqatigitillugu klorimik atuinermut annikillisissinnaavarput, imermullu klorimit akornutaasinnaasunik annikillisitsisinnaalluta. Uatsinnut pingaaruteqarpoq, erngup pitsaassusiata pitsaasuunissaa, nalunnguartut pitsaanerpaamik misigisaqartinniarlugit, Daniel Kâjangmat Lyberth, Malik-mi nakkutilliisuusoq oqarpoq.
Siornatigut Malik unnukkut matoreernerup kingornatigut imermik saliisarnikuuvoq. Naluttarfimmik atuisut amerliartornerat ilutigalugu, maannakkut periuserineqartoq malillugu imeq naammattumik salinneqarsinnaanngilaq. Tassunga pissutaavoq, nalunnguartarfiit pitsaanerusumik salinneqarsinnaagamik, minguk tamarmi nalunnguartarfiit naqqanut pigaangat, taamaattumillu nalunnguartarfiit maannakkut marlunngornikkut sisamanngornikkullu ullaakkut nal 06:00 – 08:00 salinneqartalerput, unnuap ingerlanerani minguk tamarmi nalunnguartarfiit naqqanut pereeraangat.
– Malik-mi ukiut tamaasa naluttarfiliartartorpassuit nuannaarutigisarpavut. Nalunnguartarfinniittartut amerlaneruleraangata, bakteriat amerliartorneri aamma alaatsinaattariaqartarpavut. Soorunami ajunnginnerpaamik misigisaqartitsinissarput ujartortuaannarparput, ammasarfiit allanngoraluarpataluunniit, naluttarfimmi nakkutilliisoq Daniel Kâjangmat Lyberth oqaluttuarpoq.
Ataasinngorneq, pingasunngorneq tallimanngornerlu ullaakkut nal. 06:00 – 08:00 nalunnguartoqartarpoq.
Ammasarfiit allat Naluttarfik Malik nittartagaani uani takukkit.