Ullumikkut ataasinngornermi oktoberip aappaani Innuttaasut illuanni Illorpumi workshop ingerlanneqarpoq, André Maulin ilitsersuisoralugu assit annoraaminermut naqiteriaasiat ”Serigrafi” sammineqarluni.
Assinik naqiteriaaseq ”Serigrafi” assimiit annoraaminernut naqiterinermut atorneqartarpoq.
Ullumikkut meeqqat inersimasullu aqqaneq marluk peqataaffigivaat, peqataasullu nuannisarsimasut suliaminnullu tunniussimasut oqaatigineqarpoq.
”Meeqqat peqataasut pikkusoqaat, assullu namminersorluarlutik piumassuseqarluarlutillu peqataallutik. Kusanartunillu suliaqarlutik” Lene Olsen Innuttaasut illuanni Illorpumi sulisoq oqarpoq.
Peqataasut nammineq tujuuluaqqamik, akitsip puuanik annoraaminermilluunniit nuussiffigerusutaminnik nassataqarput, nassanngitsunullu annoraaminermik Illorpumiit pisinnaasimallutik.