Innuttaasunut

Nuuk Nordisk Kulturfestival: Isiginnaagassiaq ”Sletten”

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nuuk Nordisk Kulturfestivalimut atatillugu isiginnaagassiamik aaqqissuisoqarpoq ateqartoq ”Sletten”

Isiginnaagassiaq naliginnaasumik isiginnaartitsisarfimmi ingerlanneqanngilaq, meeqqat atuareernerup ornittagarinikuusaanni blok 6-imi ingerlanneqarpoq.

Isiginnaariat inimi isiginnaartitsiffiusumi iikap sinaanni issiasinneqarput, isiginnaartitsinerlu isiginnaarianut tiguartiffigineqarluarpoq, isiginnaartitsiffiusoq bænkimik issiavimmik issiavilu ataasiittariaq atorlugu ingerlanneqarpoq, isiginnaartitsisut nikuillutik pisuttarlutik, natermullu nallartarlutik assullu uummaarissumik takutitsipput.

Isiginnaariat igalaami takusinnaavaat silataani pinnguartarfik igaallu aappaani inuit saneqquasut, taannalu isiginnaagassiamut ilaavinnarpoq.

Isiginnaagassiaq qallunaanut aappariinnut Nuummut nuussimasunut tunngaveqarpoq, nuummullu nuukkamik inissiamik blokkimiittumik inissinneqarput, isiginnaagassiaq aallartimmat angut nulianilu assut aaqatigiinngillat, aaqatigiinngissutigivaat inissiaq nuuffigisartik.

Angut kalaallisut ilinniarusussuseqarnermini kalaallisut ilinnialernermini kalaallimik arnamik naapitsivoq allalerisalerlunilu, allalerisarnini unitsikkiaraluarpaa, kingornalu paasivaa arnaq taanna inooqatiginagu sapissallugu. Kingornalu asanninneq aviliaqarnikkut pissuarnartutalimmik ingerlalerpoq.

Naggataatigullu nuanninngitsumik naaneqarluni.

Isiginnaariat tiguartilluarput, illartut qullilisullu takussaapput, isiginnaartitsisullu isiginnaarianut apeqquteqariataartanerisa isiginnaarianut peqataasitsisutut misigititsiffiuvoq.

Isiginnaartitsineq iluatsilluartutut oqaatigineqarsinnaavoq, isiginnaagassiaq naliginnaasutut ingerlanngimmat, toqqaannartumik pisumut isiginninnerusutut ingerlanneqarmat.

Isiginnaartitsisartut Karina Møller, Helene Kvint aammalu Thomas Knuth isiginnaartitsilluarput, isiginnaagassiaq atuakkiortumik nersornaasigaasimasumik Kim Leine atuakkiaaneersuuvoq ”Sletten”. Atuakkiaq atoqatigiinnermik, asanninnermik annaasaqarnermillu piviusumik tunngaveqarpoq.

Isiginnaagassiaq blok 6-imi ingerlanneqarpoq, isiginnaariarsinnaasunut 28-inut inissaqarluni, ullumilu marlunngornermi oktoberip 8-iani nal.14:00 issiaviit ulikkaarneqarput.