Innuttaasunut

Najukkami aamma nunani tamalaani: Sermersooq issittumi borgmesterit oqaloqatigiittarfiannik Arctic Mayors Forumimik pilersitseqataavoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersuumi borgmesteri, Charlotte Ludvigsen sisamanngormat Islandimi, Akureyrimi, Arctic Mayors Forum pilersinneqarmat atsioqataasut ilagivaat

Arctic Mayors Forum Issittumi borgmesterit kattuffigivaat. Peqatigiiffiup siunertarivaa, siunissami issittut nunaanni najugallit, nunanit tamalaanit eqqartorneqartillugit issittumi najugallit pingaartitaasa inooriaasiisalu ilaatinneqartarnissaasa qulakkeerneqarnissaat.

Issittup siunissaa ullumikkut qaasuitsup killeqarfia kilometerit tusindillit kujasitsigisumi aalajangiiffigineqartarpoq, aamma nunanit Issittumut attuumassuteqanngitsuniit soorlu aamma immikkoortup qanoq siunissami sunniuteqarfigineqarnissaa ilanngullugu periusissiorfigineqartartoq.

”Ukiuni makkunani uagut inuuffigisarput assorsuaq soqutigineqarpoq, nunallu amerlasuut Issittoq pillugu soqutigisaminnut periusissiorsimapput. Soqutiginninnerli taanna uagutsinnut najugaqartuusunut iluaqutaassappat, taava pingaaruteqartuuvoq suliniaqatigiiffimmit najugaqartut soqutigisaat nunani tamalaani aallunneqarpata”, Charlotte Ludvigsen oqarpoq.

Aammattaaq Kommune Qeqertalimmi borgmesteri, Ane Hansen pilersitseqataasuni ilaavoq. Arctic Mayors Forumip pisariaqartinneqarnera annertuujusoq isumaqarpoq.

”Issittumi borgmesterit ataatsimoorfeqarnissaat pingaaruteqarpoq, taamaalilluta nipi nukittunerusoq ataatsimoorluta oqariartuutigisinnaagatsigu, aamma apeqqutit annertuut nunat tamalaat akornanni sammisanut tunngasut pineqaraangata”, Ane Hansen oqarpoq.

Arctic Mayors Forumimit massakkut Issittumi Siunnersuisooqatigiinni alaatsinaattutut inissisimatinneqarnissaq qinnutigineqassaaq. Issittup soqutigisaasa tapersersorneqarnissaat pillugu kattuffik aamma suliaqartarniarpoq, ataatsimut nalunaarutigineqartartussanik.

Borgmesterinit 9-nit, Savalimmiuniit, Islandimiit, Norgemiit, Canadamiit aamma Alaskamiit kiisalu Kalaallit Nunaanniit aamma peqataaffigineqartumik, Arctic Mayors Forum pilersinneqarpoq.

Ataatsimiinneq pilersitsiffiusoq sioqqullugu borgmesterit 9-t ilasseqatigiinnermut aggersarneqarput, tassanilu Kalaallit Nunaata Islandimi sinniisoqarfia Akureyri Kommune peqatigalugu ilassinnittuupput .