Inuusuttut tallimat Nuummi Majoriami Fish Tech – GL-imik misiligummik ingerlatsisoqarnerani ilinniarsimanermut uppernarsaatitik ilassinneqatigiinnertalimmik tiguaat. Ilinniakkaminnik naammassinnittut tallimaasut, tassaapput: John Holm, Karl Erik Lange, Dario Kristiansen, Hermann Abelsen aamma Julius Holm.
Ilinniagaq Fish Tech – GL suliffissaaleqisunut aamma aalisakkerivimmi sulisunut ilinniarsimanngitsunut immikkoortukkuutaarlugu aaqqissugaavoq, aalisakkerivimmi sulinermik aamma Inuilimi – Food College Greenlandimi kiisalu Aalborgimi Tech College-mi atuagarsornermik ingerlasussanngorlugu. Inuili, Majoriaq aamma Aalborgimi Tech College suleqatigiinnerisigut suliniut aallartinneqarpoq, tapiissuteqartuullutillu Sulisitsisut, Polar Rajaat, SIK aamma PKU.
Fish Tech – GL-imi siunertaavoq, suliffissaaleqisut aalisakkerivimmilu sulisut ilinniarsimanngitsut ilinniagaqartinnissaat piginnaasatigullu qaffassaaviginissaat, taamatullu ittumik Kalaallit Nunaanni aatsaavissuaq ingerlatsisoqarpoq. Peqataasut tallimat Aalborgimi ilinniakkaminnik naammassinneqqammerput, piumassuseqarluarnerallu aamma takkuttuaannarnerat pillugit nersualaarneqarluarlutik.
Inuusuttut angutit tallimaasut ilisimasaminnik piginnaasaminnillu Kalaallit Nunatsinni aalisakkerivinni avitseqatiginninnissaminnut maanna piareerput, taakkunannga marluk atorfinereerput, allallu marluk atorfittaarnissaannik ilassinneqatigiinnermi neriorsorneqarlutik.
Ilinniarfiit aamma suliffeqarfiit akuutinneqartut una suliniut iluatsilluartutut nalilerpaat, neriuutigalugulu Fish Tech – GL-imi misilittakkat Kalaallit Nunaanni suliffissuarni ataavartumik ilinniarfissaqarnissamut siuarsaataassasut.