Henrik Rachlev isumaqarpoq kommunerujussuarmi sorpassuit suli pitsaanerulersinneqarsinnaasut. Ukiut qulit qaangiuttut nuannersunik nuanniitsunillu eqqaamasaqarfigai.
Ukiut qulit matuma siorna pissanngatigisorujussuuaa kommunit kattussuunneri qanoq isikkoqarumaarnersut. Suut tamarmik inissilluarnissaannut piffissaq ingerlaqqaassasoq ilisimalluarsimavaa. Kommuniararli kommunerujussuanngormat assigiinngissutaa ingerlaannaq malugaa.
Inuit suliassarpassuaqaleriasaarput, ulappunnersuaqalerluni aqutsiveqarfippassuillu nutaat pinngorarlutik. Ukiut qulit kingulliit kingumut qiviaraangamigit takusinnaalluarpaa kommunimut annertuumik sullissisoqarsimasoq, tamannalumi nuannaarutigaa.
”Naak amerlasuunik pitsanngorsaasoqaraluartoq suli aaqqitassarpassuaqarpugut, innuttaasut saaffiginninneri pitsaanerusumik suliarisariaqarpavut sukkanermillu akisinnaalerlugit”, Henrik Rachlev oqaluttuarpoq.
Kommuneqarfik Sermersuumi Paamiuni sulisutut Henriup malugisimavaa suleqatinilu qaninnerusumik suleqatigilluarnerulersimallutik. “Kommunit kattussuutinngikkallarmata immikkoortortani allani sulisut taamak qanitsiginngikkaluarpavut, ullumikkulli suleqatigiilluarluta”, Henrik oqaluttuarpoq.
”Soorunami ukiuni qulini kingullerni sorpassuit allannguuteqarsimapput, nuannersut ilaallu nuannerpallaanngitsut, kommunalbestyrelsimili ilaasortaalluni nuanneqaaq assiginngitsunik angusaqaqataasarluni”, Henrik oqaluttuarpoq.