Innuttaasunut

Inge Olsvig Brandt Suliffeqarnermut Isumaginninnermullu Ataatsimiititami siulittaasunngorpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersuumi Suliffeqarnermut Isumaginninnermullu Ataatsimiititaq siulittaasortaarpoq. Tassalu Inge Olsvig Brandt (IA), taassuma Charlotte Ludvigsen Kommuneqarfik Sermersuumi borgmesterinngortoq taarserpaa.

Inge Olsvig Brandt(IA), ulluinnarni Kalaallit Nunaanni Naligiissitaanermut Siunnersuisoqatigiinni allatseqarfimmi pisortaasoq 2017-imi  kommunalbestyrelsimut ilaasortanngornerminit Suliffeqarnermut Isumaginninnermullu Ataatsimiititami ilaasortaavoq.

”Innuttaaasunut sanngiitsumik inissisimasunut pisortatut sullissinerput annertuumik soqutigisariuaannarpara taamaattumillu suliassaqarfimmi tassani ataatsimiititami siulittaasutut sulinissara qilanaarisorujussuuara”, Inge Olsvig Brandt oqarpoq.

Borgmesterip taarserneranut atatillugu Suliffeqarnermut Isumaginninnermullu Ataatsimiititaq nutaamittaaq ilaasortaqalerpoq. Tassaavorlu Lone Rosengren Petersen (IA), sinniisussatut kommunalbestyrelsimut iverteqqammersoq.