Paamiuni innuttaasut qanittumi ulloqarput saleersuaarlutik, innuttaasut amerlasuut Saligaatsumi peqataaffigisaannik.
Meeqqat, inuusuttut, inersimasut utoqqaallu tamarmik illoqarfimmi saleeqataapput. Tassani puut qernertut, qerisullu puussaaraat tunniunneqarput. Qerisut puussaat sikaritsikunik katerserusuttunut tunniunneqarput.
Illoqarfik kaajallallugu inuit saliilerput. Silap nillernera ikiuunnissamut akornutigineqanngilaq. Oqortunik qaatiguulerlutik, nasat aaqqatinillu atisalerlutik inuit nuannaarlutik saleeqatigiipput. Inuit qiimarrapput, meeqqallu eqqagassanik saliineq pinnguarninngortippaat.
Illoqarfimmi saleeqataasunut annertuunik eqqugassaqarpoq. Pinngussat, teqqiat, mobiilit, rulleskøjtit eqqugassarlu ataaseq 3.000 koruuninik nalilik iluanaartut eqqugassaasa ilagiinnarpaat. Akunnerit marluk qaangiummata Paamiuni innuttaasut kommunip silataani katersuupput. Poorsuit igitassat tunniunneqarput inuillu kuponninik arlalinnik tigummiaqarput, eqquinissaminnik neriullutik.
Naggataatigut pissanganartua nalliuppoq, najukkami ataatsimiititap siulittaasua Lucia Møller-Grønvold mikrofonilerluni piareersimavoq, makitsisajaarlunilu. Eqquisut amerlasuut nuannaarlutik eqqukkatik aasarpaat, inuillu assatik pattaattarpaat. Saligaatsoq 2019 Paamiuni naggataarnera innuttaasunut ataatsimoorfiuvoq.