Nutaanik allagartalersuinikkut Nuup Kangerluani oqaluttuarisaanermut kulturikkullu kingornussat oqaluttuarineqarlutillu illersorneqassapput
”Nuup Kangerlua ukiuni tusindilikkaani kulturinit assigiinngitsunit nikeraallugu najugaqarfigineqartarsimavoq, taakkulu kulturimut tunngasunik sumiiffinnillu oqaluttuarisaanermut tunngasunik erlinnartuutigineqartunik qimataqarsimapput. Ukiut kingulliit ingerlanerini tamaanga takornariartartut amerliartorsimapput, sumiiffinnilu kulturimut tunngassuteqartut oqaluttuarisaanermilu naleqartitat oqaluttuarissavagut, taamaalilluta illersorniassagatsigit, taama oqaluttuarpoq Carina Hjort, Kommuneqarfik Sermersuumi Ineriartortitsinermut Piujuartitsinermullu immikkoortortami siunnersorti.
Taamaattumik kommunip Nunatta Katersugaasivia, Sermersooq Business Council Nuummilu takornariartitsinermik suliaqartut suleqatigalugit sumiiffinni toqqartukkani oqaluttuarisaanermut tunngassuteqartuni allagaartalersuisoqarnissaa sulissutigisimavaa, ilaatigut inuit ilivitoqaat, illukoqarfiit qallunaatsiaallu illukoqarfiini. Suliniut takornarialerinermi najoqqutassanik pitsanngorsaanermut ilaavoq, tassungalu atatillugu kommune 2 mio koruuninik aningaasaliissuteqarnikuuvoq.
”Allagartalersuinikkut takornarianut maanilu najugalinnut sumiiffinni assigiinngitsuni suut takusinnaaneraat oqaluttuarisinnaavarput, taamaattumillu innuttaasut illukunik itsarnitsanik paarsilluarnerulersinnaapput, nalunngikkunikku, qallunaatsiaat illukuiniillutik imaluunniit Thulekulturip nalaani ilivitoqqamiillutik,” Carina Hjort nangippoq.
Allagartat assigiinngitsut marluk
Sumiiffimmut tikiukkaanni allagartaq siulleq takusassaq tassaavoq oqaluttuarisaanermut tunngasumiinnermik oqaluttuartoq, sooq oqaluttuarisaanermut pingaaruteqartoq, aammalu aserorterneqannginniassammat qanoq iliorluni mianerineqassanersoq oqaluttuarineqassalluni. Sumiiffimmi ataatsimi allagartat taama ittut arlaqarsinnaapput, sumiiffiit arlallit taamatut pisariaqassatillugit.
Taava aamma allagartaq alla takuneqarsinnaassaaq, tassani sumiiffimmi pineqartumi suut takuneqarsinnaanersut allattorsimaffeqassaaq, naatsumik sumiiffiup oqaluttuarisaanermut tunngassuteqarnera allaaserineqassaaq kalaallisut, qallunaatut tuluttullu.
Immikkoortukkaaraluni allagartalersuineq
Sumiiffinni tallimani siullerni allagartat aasaanerani ikkussuunneqassapput, ukiakkullu 2019-imi naammassineqarlutik. Sumiiffiit tallimat siulliit maani takornarialerinermik suliaqartut ornikkusunneqarnerpaatut toqqagaanni Nunatta Katersugaasiviata sumiiffinni maannakkorpiaq paasissutissaataanut naleqqiullugit. 2020-mi sumiiffiit tallimat aamma allagartalersuiffigineqassapput.
Sumiiffiit tallimat tassaapput:
- Qeqertannguaq aamma Uummannaq
- Amitsuarsuk
- Neriunaq aamma Kapisillit/Kuussuaq (sumiiffik, nunakkut pisuffissaq sermillip tungaanut)
- Qoornoq
- Kangeq aamma Illuerunnerit
2020-milu sumiiffiit allagartalersuiffigineqartussat tullinnguuttut tassaapput:
- Qaarusuk
- Ujarassuit
- Itinnera
- Qooqqut
- Nordafar
Suliniut taanna Kommuneqarfik Sermersooq, Sermersooq Business Council, Nunatta Katersugaasivia maanilu takornarialerinermik suliallit; Nuuk Water Taxi, Arctic Boat Charter aamma Tupilak Travel suleqatigiissutigaat.