Marlunngormat Kommunalbestyrelsip Kommuneqarfik Sermersuummi kommunimut pilersaarummut tapiliussaq, 2B1-1 Industrivej, oqaluuserivaa.
Kommunimut pilersaarummut tapiliussaq aqqutigalugu inuussutissarsiornermut oqimaatsunut minnernut ineriartortitsinissamut periarfissiisoqassaaq, soorlu maskinaliorfiit, biilileriffiit, quersuit kiisalu pisiniartarfiit allaffiillu, immikkoortumilu nunaminertat atugassiissutigeriikkat aallaavigalugit sanaartorfissat nutaat atuutilernissaat siunertarineqarpoq.
Kommunimut pilersaarummut tapiliussaq sapaatip akunnerini arfineq-pingasuni tusarniaassutigineqarnikuuvoq aammalu tusarniaassummut akissuteqaat ataaseq pissarsiarineqarpoq. Taanna annikitsunik oqaasertaatigut taamaallaat aaqqiissuteqartitsivoq.
Suliaq ataatsimiititani marlunni suliarineqarpoq, Sanarfinermut Avatangiisinullu Ataatsimiititaq aamma Aningaasaqarnermut Inuussutissarsiornermullu Ataatsimiititaq, taakkua marluullutik suliaq Kommunalbestyrelsimut inaarutaasumik aalajangigassatut ingerlateqqippaat.
Ullumikkut Industrivej angallaffiusaqaaq ilaatigut pisuinnarnit, cykelertunit motoorilinniinngitsunillu allanit, tamaanilu aamma arlalinnik pisiniarfeqarpoq. Immikkoortumi Nuup qeqqa Nuussuarlu ataqatigiissinneqarput. Pisuinnarnut allanullu aqqusineq suli pitsanngorsarniarlugu kommunimut pilersaarummut tapiliussami siunnersuutigineqarpoq, aqquteeqqap Industrivejikkoortup titartarneqarnissaa, taassumalu aasakkut ujarassuarnik inissitsiteriffiusarnissaa. Ujarassuit taakkua ukiuunerani peerneqartassapput, tamaani aputaajaasoqartarniassammat.