Tasiilami meeqqat inuunerminnik pitsaanerpaamik aallartilluaqqullugit, Peqqinnissaqarfik aamma Kommuneqarfik Sermersooq suleqatigiikkumapput, naartusunik siunnersuisarnissaq aammalu ilitsersuisarnissaq pillugu
Tapersersuineq, toqqissisimaneq aammalu paasinninneq. Tasiilami inuusuttut naartusut tamanna misigissavaat Tasiilami pisortanut saaffiginnissuteqaraangamik. Peqqinnissaqarfik aammalu Tasiilami kommunip ilaqutariinnik sullissivia inuusuttut naartusut anaanatut inuunerup pitsanngorsarneqarnissaa pillugu isumaqatigiissuteqarput.
Suliniuteqarneq ilaatigut angajoqqaanngortussat pikkorissartinneqarnerannik anaanallu gruppeqartinneqarnerannik ilaqassaaq, tassani inuusuttut misilittakkaminnik avitseqatigiissinneqartassapput.
Tasiilami immikkoortumi pisortaq, Hjørdis Viberg, oqarneratuut inuusuttut naartusut tamarmik tunuliaqutaqanngillat naartuneq pillugu tapersersuinermik siunnersuinermillu ikiuussinnaasunik:
”Massakkut ajornartorsiutit sioqqunniarpavut arnallu toqqissisimasumik naartunissaannut ikiorlugit taamaalillutik toqqissisimasumik ilaqutariittut inuuneq aallartissinnaammassuk ”
Suliniutit pitsaaliutaasut
Hjørdis Viberg oqaluttuarpoq, angajoqqaanngortussanut siusissukkut suliniuteqarnissaq pingaaruteqartuusoq. ”Aatsaat ajortoqalerpat ikiuunnissarput pinngitsoortikkusoqaarput, taamaattumik taamatut suliniuteqarnermik ikiuineq pitsaasuuvoq. ”Naatsorsuutigaarput tamanna annertunerusumik allanngueqataassasoq, nalunngilaralu neqeroorut pisariaqartinneqartoq, pingaartumik anaanaasunut inuusuttunut ” oqarpoq.
Suliatigut assigiinngitsutigut peqqinnissaqarfiup aammalu ilaqutariinnik sullissiviup suleqatigiissuteqarnerat inuiaqatigiinnut iluaqutaasoq isumaqarpoq. ”Taamatut periuseqarluni ataatsimut aaqqiissuteqartoqarsinnaavoq, peqatigiilluni”
Angajoqqaat pikkorissartinneqartarnerat
Angajoqqaanngortussat qanoq ilaqutariiusoqarsinnaaneranik nalornissuteqartut ikiorneqassapput. ”Ilisimasassaannik tuniorartarpavut, qanoq ilaqutariittut aallartilluartoqarsinnaanera pillugu. Isumassuinerup suuneranik nassuiaattarpavut, aamma naartunerup nalaani qanoq imminnut paarinisaat pillugu, ” nassuiaavoq. Tamatuma saniatigut angajoqqaanngortussat ilitsersorneqartarput, meerartaarnerup qanoq ittuuneranik, qanoq piareersartoqarsinnaaneranik kiisalu qanoq imminnut ikioqatigiittoqarsinnaaneranik”.
Angajoqqaanik pikkorissaanerit ukiumut marluk Tasiilami ingerlanneqassapput.
Anaananngortut ataatsimoortarfii
Pitsaaliuinerinnarmik suliaqartoqassanngilaq. Aammattaaq malitseqartitsisarnerit annerusumik eqqumaffigineqassapput.
”Anaanat inuusuttut anaananngortut ataatsimiitttarfiinik neqeroorfigineqartassapput, taamaaliornikkut anaananngortut imminnut ikioqatigiittarsinnaammata, peqatigitillugulu pisuni anaananngorlaatut artornarsinnaasuni kisimiittassanngimmata” Hjørdis oqaluttuarpoq. Nassuiaavoq naartoreernerup kingornatigut aamma malinnaanissaq pingaaruteqartuusoq, siunnersuuteqartarlunilu ilitsersuisoqartarnissaa ilanngullugit, taamaalilluni angajoqqaanut meeqqanullu oqinnerulissammat. ”Angajoqqaat qitornartaareernerup kingornatigut aamma neqerooruteqarfigisinnaagivut ilisimassagaat” naqissusiivoq.