Marsip sisamaaniit pisortanit pisartagallit tamarmik ullut 14-ikkaarlugit pisartagaqalernissartik naatsorsuutigissavaat.
Tunniussisarnerit tamarmik qinnuteqaatinik akuersisoqareeraangat aatsaat tunniunneqartaraluarput, qaammammut 900-t missaannik tunniussisoqartarluni.
”Tunniussinerit taamak amerlatigisut allaffissorujussuarnernik kinguneqartarput, saniatigullu kinguleriiaattorpassuaqartarluni, maleruagassat nutaat atuutsilernerisigut piffissaq allaffissornerujussuarmut atortagarput pitsaanerusumik innuttaasunik kiffartuussinermut atorsinnaalissavarput”, Isumaginninnermut Suliffeqarnermullu Ingerlatsivimmi Oqartussaqarfimmi Fagchefi Cecilie Victoria Schierbeck oqarpoq.
Ullut 14-it siulliit tunniussinerit ataasinngornermi pissapput innuttaasullu sap.ak. kingulliit marluk pisartagaqarnissaminnik akuerineqarsimasut tamarmik allannguutit pillugit toqqaannartumik paasitinneqareerput.