Sisamanngormat februaarip 14-ianni unnukkut 2019-imi kulturikkut nittarsaassisoq nutaaq nalunaarutigineqarpoq. Tamanna pivoq Nuummi Nunatta Atuagaateqarfiani.
Borgmesterip Asii Chemnitz Narupip sisamanngormat unnukkut nalunaarutigisinnaalerpaa, 29-nik ukiulik atuakkiortoq Niviaq Korneliussen tassaassasoq kulturikkut nittarsaassisoq nutaaq, eqqumiitsuliortoq Gedion Qeqe Tasiilameersoq taarserlugu.
”Piffissanngorpoq Aningaasaateqarfik Sermeq atuakkiortumik kulturikkut nittarsaassisumik toqqaanissaanut. Atuakkiortoq, nunatsinniinnaanngitsoq, nunanili allani aamma uisitsinissaminik piginnaaneqartoq. Niviaq Korneliussen tassaavoq eqeersimaartumik oqaaseqartartoq, inuusuttut allat allattarnissaannik kaammattuisartoq. Nunatsinni sumiiffinni assigiinngitsuni pikkorissartitsilluni sungiusaasarnikuuvoq. Nunani allani maluginiarneqarsimavoq, atuakkiaalu oqaatsinut allanut nutserneqartarput, taavalu aamma oqaluttualiaa aqqutigalugu Nunatsinni ´qaffassimaarnerulerpugut´. Niviaq qanga ileqqutoqqat piunnaarlugit nutaaliorpoq”, borgmesteri Asii Chemnitz Narup Aningaasaateqarfik Sermeq sinnerlugu siulersuisunut ilaasortaq Niviaq Korneliussen-imut oqalugiarnermini oqarpoq.
Niviaq Korneliussen atuakkiortutut aallartippoq 2013-imi Allatta! siullermilli ingerlanneqarmat ajugaagami. Allallaqqinneqqusaannermi oqaluttualiarivaa San Francisco. Aappaaguani siullermeerluni atuakkiaa HOMO sapienne kalaallisut qallunaatullu saqqummerpoq, kingornagullu atuagaq tyskisut, franskisut, tuluttut, islandimiusut svenskisullu saqqummersinneqarluni. Atuagaq norskisut, finskisut tjekkiamiutullu saqqummersinneqangajalerpoq, nunallu allat amerlanerit soqutiginnillutik nalunaareerput. Frankrigimi Tuluit Nunaannilu atuagaq piffissap sivikitsuinnaap iluani nuannarineqarlualerpoq, tusagassiorfiillu soorlu Le Monde, The Guardian, Marie Claire aamma The Economist allaaserivaat.
Niviaq Korneliussen toqqagaanini pillugu nammineq uissuummisorujussuuvoq.
”Sydafrika-mi feeriartillunga Kommuneqarfik Sermersuumit allagarsivunga. Allagarsiara atuarakku paasivara kulturimik nittarsaassisussatut toqqarneqarsimallunga. Nuannersumik tupaallappunga.
Kalaallit atuakkioriaasiata ineriartortinneqarnissaa uannut pingaaruteqarpoq, taavalu kulturimik nittarsaassisutut toqqagaanera atorluassagukku neriuppunga tamanna pillugu sammisaqarluarumaarlunga. Atuakkiornerup silarsuaanut tunngasunik aaqqissuussisarnissara qilanaaraara, kulturimik nittarsaassisartutut toqqarneqaqqammersoq unnerpoq.
Niviaq Korneliussen Nanortalimmi 1990-imi inunngorpoq, maannakkullu nutaamik atuakkiorluni aallartereerpoq. Atuakkiaa inissitsiterneqaleruttorpoq, neriupporlu ukiup matuma ingerlanerani saqqummersinneqarumaartoq.