Marlunngornermi unnukkut Tasiilap katersortarfiani innuttaasunut ataatsimiititsisoqarpoq. Borgmester Asii Chemnitz Narup kommunalbestyrelsemilu ilaasortat sisamat peqataapput.
Katersortarfik inoqarluarpoq orniguttullu apeqqutissarpassuaqarput. Asiip saniatigut Harald Bianco, Knud Mathiassen, Mala Høy-Kuko aamma Laura Taúnâjik peqataapput.
Borgmester Asii ataatsimiinneq ammarpaa ilaatigullu oqarluni:
”Nuannaaqaanga Tasiilamiikkama. Maaniippunga ilaatigut inuusuttut kulturikkut illuat nalliuttorsiutigiartorlugu. Inuusuttunik naapitaqarpunga oqaloqateqarlugalu. Marlunngornermi unnukkut katersortarfimmi unnussiuaartitsisoqarmat peqataavunga. Pisoq nuanneqaaq.
Ukioq manna Kommuneqarfik Sermersooq ukiuni qulini nalliuttorsiussaaq. Tulluusimaarutigeqaara kommunermioqatigigassi. Ukioq manna Tasiilaq ukiuni 125-ni nalliuttorsiussaaq. Kommuneqarfik Sermersuumi innuttaasut 23.000-put. Kalaallit Nunaanni innuttaasut 41 procentii kommunitsinniipput”.
Asii oqaaseqareermat innuttaasut apeqqarissaarput.
”Qaqugu umiatsiavileqarneq pitsanngorsaavigineqassava?”
”Ikkatteq qanoq pineqassava?”
”Qaqugu aqquserngit iluarsaanneqassappat?”
”2019-mi inissianik sanaartortoqassava?”
Ilaatigut tamakkua apeqqutigineqarput. Innuttaasunut ataatsimiinneq arfineq marlunut aallartippoq qulingiluanullu naammassisussatut naatsorsuutigineqarsimagaluarluni, apeqqutilli amerlangaarmata ataatsimiinneq aatsaat qulinut naammassivoq.