Missingersuutit 2019: Sanaartornermut missingersuutini 300 millionit koruunit Kommuneqarfik Sermersuumi illoqarfiit pingaarnersaanni sumiiffiillu sinnerini ineriartortitsinissamut qulakkeerinnittuupput.
Kommunalbestyrelsip tamarmiusup, ataasiakkaat eqqaassanngikkaanni, marlunngormat ualinerani unnukkullu Kommuneqarfik Sermersuumi kommunip 2019-imut missingersuutissai akuersissutigai. 80 millionit koruunit sinneqartoorutaassasut missingersuutaavoq, saniatigullu Nuup kommunillu sinnerata ineriartortinneqarnissaanut sanaartornissamut 300 millionit koruunit aningaasaliissutigineqarput. Tamatuma saniatigut Kommuneqarfik Sermersuumi kikkut tamarmik nuannaarutigisinnaassavaat kommunimut akileraarutip procentia taamaaginnassammat.
Missingersuutit 2019-imut ima imaqarput:
- Ataatsimut katillugit 1,9 milliardit missingersuutaapput.
- 80 millionit koruunit sinneqartoorutigineqassapput
- Sanaartornermut aningaasaliissutaasinnaasut 300 millionit koruunit missaaniissapput
- Akileraarut allannguuteqartinneqassanngilaq
Borgmesteri Asii Chemnitz Narupip (IA) ukiumut tulliuttumut missingersuutissat naammagisimaarai.
”Kommunalbestyrelsip tamarmiusup missingersuutit pitsaasut angusaqarluarusussusermillu takutitsisuusut taperserpai – minnerunngitsumik sanaartornissamut aningaasaliissutinik pisariaqartinneqartunik siunissamullu qulakkeerinninnissamut periarfissiimmata. Suli Nuummut nuuttartut amerliartorput, taamaattumillu siunissamut ungasinnerusumut Illoqarfiit Pingaarnersaat pillugu Periusissiap ingerlateqqinnissaa pisariaqarluinnarpoq. Taamaallaat Nuummi atugassaritinneqartut pitsaanerpaat pilersissinnaavagut sanaartugassanut nutaanut, inissianut, sanaartorfissagissaanernut kiisalu attaveqaatit pitsanngorsarnissaanut aningaasaliissuteqartuarnikkut,” borgmesteri oqarpoq, nangillunilu:
”Tamatuma saniatigut missingersuutit kommunip illoqarfiisa nunaqarfiisalu sinnerisa iluaqutigisussaavaat. Nutaanik sanaartortoqarneratigut kiisalu meeqqanut, inuusuttunut utoqqarnullu atugassarititaasunik pitsanngorsaanikkut. Assersuutigalugu nunaqarfinnut ukiumut aningaasaliissutaasartut 2023-p tungaanut 10 millionit koruuninik amerlineqarnerat, taamalu 2019-imi 27 millionit koruuniunissaat nunaqarfiit iluaqutigissavaat.”
”Kiisalu isumaginninnermut tunngasunut pitsanngorsaanissamut suliniutinut nutaanut assigiinngitsorpassuarnik missingersuutit imaqarnerat nuannaarutigaara. Ilaatigut siunnersortimut imminut toquttarnernut pinaveersaartitsinissamik suliaqartussamik, Paamiuni inuusuttunut siunnersortimut angajoqqaarsianullu siunnersortimut aningaasanik immikkoortitsivugut.”
Meeqqanut aamma inersimasunut innarluutilinnut 40 millioningajaat immikkut aningaasaliissutaasut