Marlunngornermi kommunalbestyrelsip ataatsimiinnerani meeqqat inersimasullu innarluutillit 39,8 millionit koruuninik immikkut aningaasaliiffigineqassasut Kommunalbestyrelsimut ilaasortanit akuersissutigineqarput. Aningaasartai 2018-imut missingersuutinut nuunneqassapput.
20 millionit koruunit meeqqanut immikkut pisariaqartitsisunut atorneqassapput. Meeqqanut angerlarsimaffiup avataanut inissinneqarsimasunut aningaasartai arlallit atorneqassapput. Missingersuutinut immikkoortinneqarsimasunut naleqqiullugu 7,5 millionit koruuninik atuivallaartoqarpoq.
Tamatuma saniatigut ukioq manna inuusuttualuit angerlarsimaffiup avataanut suliniuteqarfigineqarlutik inissinneqarput, tamanna pisut ilaanni pitsaanerpaamik aaqqiissutaammat. Ukiup sinneranut allannguuteqarani ingerlatsinermi 11 millionit koruunit tungaannut aningaasartuuteqassaaq.
”Borgmesteriuleramali meeqqat inuusuttullu immikkut aningaasaliiffigineqartussanngortillugit suli itigartitsinikuunngilagut, maannalu kommunalbestyrelse soorunami itigartitsinavianngilaq. Meeqqat angerlarsimaffiup avataanut inissinneqartut pillugit suliassaqarfik aqukkuminaatsorujussuuvoq, pissutigalugu pisut ilaanni sumiginnaasoqartillugu aamma ikiorsiissutissatut periarfissat naammanngikkaangata inatsisitigut aalajangersagaareermata. Taamaattumik suliassaqarfik immikkut aningaasaliiffiginissaa pisariaqarajuttarpoq, aamma taamaaliorusuppugut,” taama oqarpoq borgmesteri Asii Chemnitz Narup (IA).
Kommuneqarfik Sermersuup Danmarkimi inuit innarluutillit najugaannut inersimasut inissitai 44-pput Kalaallillu Nunaanni inuit innarluutillit najugaannut inersimasut inissitai 39-ullutik. Danmarkimi inissiinernut immikkut 4,9 millionit koruuninik aamma Kalaallit Nunaanni inissiinernut immikkut 14.950.000 koruuninik Kommunalbestyrelse aningaasaliissoteqarpoq.
Meeqqanut inersimasunullu innarluutilinnut aningaasaliinerup saniatigut kommunalbestyrelse ilaatigut utoqqarnut tunngasunut immikkut 1 millionit koruuninik aamma Nuummi najukkami ataatsimiititaliamut nutaamut 1.125.000 koruuninik aningaasaliissuteqarpoq.