Nuummi Katersugaasivimmi maannakkut saqqummersinneqartuni qulequtarineqartoq tassaavoq atuakkiortoq Ole Brandt. Saqqummersitsineq ullormi 100-nik ukioqalerfissaraluani tassalu ataasinngorneq 22. oktobari 2018 ammarneqarpoq.
Unnukkut nipilersortut tassaapput FFI-Band, Ole Brandtillu atuakkiortuunerata oqaluttuassartaa pillugu Sørine Steenholdt oqaluttuartuuvoq aamma Rasmus Brandt, Ole-p ernera angumminut tunngasunik oqaluttuarpoq.
”Saqqummersitsineq piviusorpalaarpoq, allaanngilaq assit aqqutigalugit Ole Brandt ilaqutaalu naapiinnarlugit, nammineq najoqqutassiai, kiisalu Ole-p pigisimasai inuuneranut pingaaruteqarluinnarsimasut assersuutigalugu skrivemaskiina aamma nasaq nuannarilluinnagaa”, taama oqarpoq Vinni Birkedal, Nuummi Katersugaasiviup pisortaa.
Saqqummersitsineq Ole Brandtip ilaqutai kiisalu Nunatta Katersugaasivia Allagaateqarfialu suleqatigalugit piviusunngortinneqarpoq, saqqummersitsinerlu 15. januaari 2019 tungaanut takusarneqarsinnaavoq.
Ammaanersiornermit assit matuma ataani takukkit.