Nuuk: Sermersuumi kulturikkut nittarsaassisoq naapiguk eqqumiitsuliaalu alakkarlugit

Gedion Qeqe Tasiilameersoq, Kommuneqarfik Sermersuumi kulturikkut nittarsaassisoq Nuummiippoq. Pingasunngorpat Gedion Qeqe oqalugiarluni saqqummiissaaq tallimanngorpallu kulturikkut nittarsaassisutta najukkatsinnilu eqqumiitsuliorlutik sanaluttartut assassukkaminik saqqummersitsinerat alakkarsinnaavat.

Ukiup aallartinnerani Tasiilami aaqqissuussinermi Gedion Qeqe Kommuneqarfik Sermersuumi kulturikkut nittarsaassisussatut toqqarneqarpoq. Nuummi innuttaasut inuunerminik eqqumiitsuliarisartakkaminillu oqaluttuartoq massakkut tusarnaariassallugu periarfissaqalerput.

Kingorna najukkami eqqumiitsuliorlutik sanaluttartut Gedion Qeqellu eqqumiitsuliaat saqqummersinneqartut alakkarsinnaavatit.

Gedion Qeqe ukioq manna kulturikkut nittarsaassisussatut suaarutigineqarnermini  qiperuisartutut inuussutissarsiuteqarnini naatsumik oqaluttuaraa: ”1989-imi aalisartuujunnaarama nammineq qiperuiaasera nassaaraara. Ajutoorsimavunga aalisarsinnaajunnaarlungalu sulisinnaajunnaarlunga. Tassani tassa eqqumiitsulianik sanaluttartuinngorpunga.”

Gedion Qeqe nassunnik, qilalukkat aarrullu tuugaavinik ujaqqanilluunniit qiperuisarpoq.

Gedion Qeqep pingasunngornermi oktobarip 24-ani Nuummi Innuttaasunut Sullissivimmi oqalugiarluni saqqummiinissaanut aggersinnaavutit.  Eqqumiitsulianik sanaluttartutut inuunini eqqartussavaa.  Tamannalu pissaaq nal. 18.30-20.00, Kommuneqarfiup Allaffeqarfiani, Kuussuaq 2.

Ullut marluk kingorna kulturimik nittarsaassisartoq najukkami eqqumiitsulianik sanaluttartut allat peqatigalugit eqqumiitsuliortut sanaluttarfiani Ajagami saqqummersitsissapput. Saqqummersitsineq sioqqullugu Gedion Qeqe sanaluttarneq pillugu sammisassaqartitsiumaarpoq.

Sanalukkanik eqqumiitsulianik saqqummersitsineq
Tallimanngornermi oktobarip 26-iani
Nal. 13.00
Eqqumiitsuliortut sanaluttarfiat Ajagaq, Nuukullak 18, Nuuk