Kommuneqarfik Sermersuup illoqarfiinit nunaqarfiinillu eqqagassat illoqarfiit pingaarnersaannut ikuallagassanngorlugit ingerlattarpaat.
Kommuneqarfik Sermersuup Eqqagassaleriffiata killiffik qaammatikkuutaartumik innutaasunut paasissutissiissutigisarpaa. Killiffik una septembarip qaammataa pillugu paasissutissaavoq.
Killiffiup nalunaarsornera aggustimut tunngasoq ugguuna atuaruk
Sermersuumi Eqqagassaleriffik septembari ilanngullugu eqqakkanik 17.065 tonsinik tigusivoq (17 millioner kilo missaanni) Nuummi Eqqagassanik tigooraavimmi suliarineqartussat ikuallanneqartussallu. Eqqagassat 1.208 tonsit missaanniittut kommunip illoqarfiinit nunaqarfiinillu illoqarfiit pingaarnersaannut ingerlanneqartarput.
Qanoq Kommuneqarfik Sermersuup illoqarfinni nunaqarfinnilu eqqagassanik passussineq ingerlattarpaa?
Akissut tassaavoq iluarsiinerit ataasiakkaanut tulluarsakkat. Kommunimi illoqarfinni nunaqarfinnilu piffimmi pissutsit eqqarsaatigisariaqarput – ilaatigut innuttaasut amerlassusaat aamma eqqagassat amerlassusaat. Eqqagassanittaaq passussinerup aaqqissuussaanera aamma assut sunniutaasarpoq. Illoqarfinnut nunaqarfinnullu qanoq akulikitsigisumik umiarsuarmik tikittoqartarnera assigiinngissuteqarsinnaammat. Soorlu aamma illoqarfimmut nunaqarfimmulluunniit umiarsuaq sorleq tikinnersoq apeqqutaasaqimmat.
Kapisillit aamma Qeqertarsuatsiaat
Kapisilinni Qeqertarsuatsiaanilu eqqagassat ikuallanneqarsinnaasut containerinut angisuunut ussissunulli katersorneqartarput– Presto PSR 10 taasartagaannik (assi takuuk). Eqqagassat taakkununnga containerinut naqillugit ikiorarneqartarput, inikillisarlugit. Containeri ulikkaalerpat Sermersuumi Eqqagassaleriffik ingerlaannartumik containerip atortorissaarutaanit nalunaarfigineqartarpoq, taamaalilluni containeri eqqagassanik imalik Royal Arctic Line-p umiarsuaataata tikittussap tullianut ilaatinneqartarput. Kapisilinni containerinik paarlaassineq qaammatit marluk missaat qaangiukkaangata pisarpoq. Qeqertarsuatsiaani containeri ullut 14-t missaanni qaangiukkaangata imaarneqartarpoq. Septembari ilanngullugu Kapisilinniit Qeqertarsuatsiaaniillu Nuummi ikuallaavimmut 111 tonsit ingerlanneqarput.
Arsuk
Arsummi eqqagassat sapaatip akunneranut 400 kilo missaanniittarput. Eqqagassat ballinut ussissunut X25-ballepresseri atortorissaarutigalugu poortorneqartarput (assi takuuk). Ballit Nuummi containerimut ikillugit ikuallaaviliaanneqartarput. Sermersuumi Eqqagassaleriffik ukioq manna Arsummit eqqagassat 16 tons tikittoorutigai.
Paamiut
Paamiuni ullut 10-12 ingerlanerini eqqagassat 15 tonsit missanniittarput. CC 50-komprimatorip eqqagassat 500 kiilukkaarlugit ballinngorlugit sisamanik teqeqqulinngorlugit naqittarpaat. Maskiina wrapimik taaneqartartup ballit plastikkinut poortortarpai containerimut ikillugit Illoqarfiillu pingaarnersaannukaallugit. Sermersuup Eqqagassaleriffia ukioq manna Paamiunit eqqagassanik 238 tonsinik tigussaqarpoq.
Tasiilaq
Tasiilaq taamaallaat aasaanerani umiarsuarmik tikinneqartarpoq. Tassa imaappoq, ukioq naallugu eqqagassat qaammatit arfinillit tikillugit katersaasarput. Eqqagassat ingerlaannartumik suliarineqartarput poortorneqarlutillu. Taamaalilluni tipaat sakkortuallaarunnaartarpoq. Tasiilami eqqagassat poortortarnerat Paamiusutulli ippoq, umiarsuarmik Nuummut ingerlanneqannginneranni. Ukioq manna Sermersuup Eqqagassaleriffiata eqqagassat 525 tonsit missaat Tasiilamit tiguai.
Iluarsiissutissat allat takkutissapput
Kommuneqarfik Sermersuumi tunumi nunaqarfiit ilaannit eqqagassalerineq taakkulu ingerlanneqartarnissaannut iluarsiissutissat atuutsinnissaat aallartingajalerput. Tamanna pissaaq nunaqarfiit eqqaavissuisa iluarsartuunnerisa annertuut ataatsimullu suliassaqarfiit iluarsartuunnerinut atatillugu.