Kommuneqarfik Sermersuup Sanarfinermut Avatangiisinullu Ingerlatsivia 2016-imili nunaqarfinni iluarsaassinissamik pilersaarummik annertunerusumik ingerlatsivoq.
– Iluarsaaneq ingerlarujoorpoq, Ivan Falck Petersen pilersaarummut siunnersorti oqarpoq.
Taassuma sapaatit akunnerni kingullerni Tasiilami iluarsaassineq qanimut malinnaavigiartorpaa.
– Tiilerilaami assut suliaqarpugut. Eqqaavissuaq aaqqissuussaalluarnerulerpoq. Suliffeqarfinngorsimavoq eqqagassanik tigooraavik. Eqqagassat tamaasa poortoriarlugit Tasiilamut nassiunneqassapput.
-Nunaqarfik torernerulerpoq. Nunaqarfik siornarnit eqqiluinnerusumik avatangiiseqalerpoq.
Ukioq kingulleq Arsuk Tiileqilaarlu annertuumik iluarsaaffigineqarput. Kuummiut Qeqertarsuatsiaallu iluarsaaffigineqalerput ukioq mannalu naammassineqarnissaat pilersaarutigineqarpoq. Isertoq Sermiligaarlu 2019-imi aallartinneqarnissaat naatsorsuutigineqarpoq 2020-imilu naammassineqassallutik.
– Pilersaarutip ingerlarngani nunaqarfiit eqqaavissuini/toqqorsiviini kiisalu nunaqarfinni tamanit ornigarneqartuni silamilu annertuumik iluarsaassisoqarpoq. Iluarsaassinerup nalaani kommunip pigineqartut soorlu puttasut, umiatsialeriviit, amutsiviit pinnguartarfiit il.il. iluarsartuunneqarput.
Immikkoortitsineq annertunerusoq
Eqqagassanik immikkoortiterineq annertunerusoq tullinnguuppoq.
-Nerisakunit eqqagassat eqqagassallu allat immikkoortitertalissavagut. Tasiilami suliffeqarfiit paaqqinnittarfiillu nerisakunit eqqagassatik immikkoortitertalissagaat siunertaavoq. Nerisakut tamarmik immikkoortiterlugit tunniunneqartassapput poortorneqarlutik nassiunneqartassallutillu.
– Eqqagassat pitsaanerpaamik suliarineqarnissaaq anguniarneqarpoq, Ivan Falck Petersen naggasiivoq.