Tasiilami takornariaqartitsineq inuussutissarsiornerlu pillugit isumasioqatigiinneq ullaaq manna aallartippoq, Kommuneqarfik Sermersuumiit, naalakkersuisoqarfimmiit, takornarialerisuninngaanniit tunumilu najugaqartut isumasioqatigiinnermut peqataapput.
Inuussutissarsiornermut Nukissiuuteqarnermullu naalakkersuisoq Aqqalu Jeremiassen tikilluaqqusivoq ilaatigullu oqarluni: – Nuannerpoq maani peqataaniarlutik takkuttut. Ulluni tullerni maaniippugut tusarnaassallusi. Maaniinngilagut oqaluttuukkiartussallusi sussanerlusi. Nammineq tamanna nalunngilarsi. Ilissi manna ilisimaarilluarparsi. Tunumi aporfiusinnaasut ineriartorfiusinnaasullu ilissi nalunngilasi.
Neriuppunga nutaanik atorsinnaasatsinnik ilisimasaqalissasugut.
Neriuppunga periarfissanik nutaanik maani nunattalu sinnerani atorsinnaasatsinnik peqassasusi, Aqqalu Jeremiassen ilaatigut oqarpoq.
Borgmester Asii Chemnitz Narup Tasiilameeqqinnini nuannaarutigivaa. Ilaatigullu ima oqarluni: – Qujanarujussuaq maaniissinnaangama peqatigalusi. Ippassaq tikikkatta illoqarfiup tungaanut ingerlalluta illoqarfik kusanangaarmat nuannaarpunga. Assut tikikkuminarpoq, nuanneqaaq. Manna alutornartupilussuuvoq, illoqarfik kusanartunik avatangiisilik, takornariarfigissallugu piukkunnarpoq. Isumalluarpunga.
. Maani ineriartorneq maanimiunik sorlaqanngippat iluatsinnavianngilaq, taamaattumik suleqatigiinnissaq pingaaruteqartorujussuuvoq, Asii Chemnitz Narup ilaatigut oqarpoq.
Ullaap tungaani saqqummiussisut arlaliupput. Ilaatigut Mads Skifte Visit Greenlandimiit saqqummiivoq, taassumallu nunatsinni takornariaqartitsineq kiisalu najukkami qanoq tapertaasinnaanerlutik eqqartorpaa.
Iddimanngiiu Bianco, Destination East Greenlandimi pisortap ilaatigut eqqartorpaa Tasiilami takornariaqartitsinerup siunissaa Gerth Ignatiussenillu Tasiilami takornariaqartitsinikkut misilittakkat eqqartorlugit. Gerth Ignatiussen arlalinnik illusinikuuvoq takornarianullu unnuisitsisarluni.