Innuttaasunut

Asii: Nunarsuarmi anguniakkat naleqqutarisatta pingaarnersaraat

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

FN-ip Nunarsuarmi Anguniagaanik ataatsimeersuarnerup nittarsaassinera Kommuneqarfik Sermersuumi borgmesterip nuannaarutigaa.

 

Folketingimi ilaasortat Mogens Lykketoft aamma Aja Chemnitz Larsen, ullumi Katuami ataatsimeersuarnermi CSR Greenlandimit aaqqissuunneqartumi oqalugiarput.

Nunarsuarmi Anguniakkat 17-iusut Kalaallit Nunaanni inuussutissarsiornermit eqqumaffigineqarnerulernerat Kommuneqarfik Sermersuumi borgmesterip Asii Chemnitz Narupip nuannaarutigaa. Taassuma nunarsuarmi anguniakkat pineqartut nunamilu maani ineriartornermut qanoq sunniuteqarsinnaanerat sivisuumik ukkatarisimavai.

”FN-ip nunarsuarmi anguniagai tamatsinnut siunnerfissamik tikkuussisuusariaqartut isumaqarpunga. Inuiaqatigiittut anguniakkat eqquutsinniarnissaannik pisortat namminersortullu tamatta pisussaaffeqarpugut,” Sermersuumi borgmesteri oqarpoq.

Ukiut marluk matuma siornali nunarsuarmi anguniakkat pilersinneqarmata, Kommuneqarfik Sermersooq ulluinnarni ingerlatsinermini anguniakkat pineqartut atussallugit aalajangerpoq.

”Ulluinnarni allaffissornikkut ingerlatsinermi nunarsuarmi anguniakkat ilaatinneqarnissaat anguniarlugu arlalinnik suliniuteqarsimavugut. Ukioq manna aqutsisut sapaatip akunnikkaartumik ataatsimiittarnerminni, sapaatip akunnikkaartumik anguniagaq ataaseq sulissutigisarsimavaat, soorluttaaq pisortat tamarmik nunarsuarmi anguniakkat pillugit pikkorissartinneqarsimasut. Nunarsuarmi anguniakkat ilaasa sulissutigineqarnissaat soorunami kommunitut akisussaaffigaarput. Assersuutigalugu pitsaasumik ilinniagassaqartitsineq imaluunniit kaannermik akiuineq, kisianni isumaqarpunga anguniakkat inuiaqatigiinni susassaqarfinni tamani ilaatinneqarpata angusassagut annertunerujussuusinnaasut”, Asii Chemnitz Narup oqarpoq.

Nunarsuarmi anguniakkat pillugit pisortat pikkorissartinneqarnerisa saniatigut, suliniutit inerneri takkuttalereersimapput.

”Suliniutit inernerisa siulliit ilagaat, nunarsuarmi anguniakkani nr. 11 – Illoqarfiit Imminnut pilersorsinnaasut, kommunimut pilersaarummut tapiliussani nutaani tamani ilaatinneqartalersimanera. Siunissami illoqarfiup pilersaarusiornerani anguniakkat arlallit eqqarsaatigeertussaavagut. Silap pissusaanut innarliissanngilaq, aningaasaqanermik ineriartortitsissaaq suliffissanillu pilersitsisuussalluni. Aallaqqaataaniit anguniakkat ilaatinneqarnerisigut, illoqarfiit pingaarnersaat innuttaasutta tamarmik angerlarsimaffimmittut isigisaat pilersissinnaagipput qularinngilara”, Asii Chemnitz-Narup oqarpoq.

Nunarsuarmi Anguniakkat 17-it

 

  • Piitsuuneq atorunnaarsinneqarli
  • Kaattoqarunnaarli
  • Peqqinnissaq atugarissaarnerlu
  • Ilinniagaqarneq pitsaasoq
  • Naligiisitsineq
  • Imeq eqqiluisaarnermilu atortut saligaatsut
  • Nukissiuutit nungusaataanngitsut
  • Suliffiit naammaginartut aningaasarsiornermilu siuariartorneq
  • Suliffissuaqarneq, nutaaliorneq attaveqaatillu
  • Assigiinngissutsinik annikillisaaneq
  • Illoqarfiit atajuarsinnaasut
  • Akisussaasumik atuineq tunisassiornerlu
  • Silap pissusaanut suliniuteqarneq
  • Immami uumassusillit
  • Nunami uumassusillit
  • Eqqissineq, naapertuilluarneq suliniaqatigiiffiillu qajannaatsut
  • Nunarsuarmi sulinermi peqatigiinneq

FN-ip anguniagai 17-it