Maajip 22-iani aallartittumik Kommuneqarfik Sermersooq eqqakkat angisuut aaneqartarnissaannik innuttaasunut nammineerisaminnik ineqartunut neqerooruteqarpoq. Sapaatip akunnerani uani kommunip eqqaavilerisui Nuup qeqqani ingerlaarput. Nammineq pigisarnik ineqaruit kommunip Eqqakkanik Tigooraavia aallertitsinissaq pillugu sianerfigisinnaavat allaffigaluguluunniit.
“Eqqakkanik najukkamut aallertitsinissamik neqerooruterput innuttaasut amerlasuut atorluarsimavaat. Tamanna soorunami naammagisimaarparput, siornatigut eqqakkanik katersisarnermut sanilliullugu pitsanngoriaatitut isigigatsigu,” Kommuneqarfik Sermersuumi ingerlatsinermut avatangiisinullu pisortaq Frank Rasmussen oqarpoq.
Ataasiakkaanilli ajornartorsiuteqarpoq. Eqqakkanimmi katersuinissamik neqeroorutip tusarliunneqarnera tamanut anngussimarpasinngilaq.
“Illoqarfimmi suli takussaavoq aqquserngup sinaani eqqakkat qimaannarneqarsimasut, tamannalu paasisinnaanngilarput. Tamanna ingammik sumiiffinni eqqakkanik aallerfigereersimasatsinni takussaavoq. Pingaartumik maluginiarsimavarput sumiiffinni arlalinni sanaartornermit eqqakkat, eqqakkatut angisuunut taaneqarneq ajortut qimaannarneqartarsimasut. Sanaartornermit eqqakkat nammineerluni Eqqakkanut Tigooraavimmut tunniunneqartussaapput. Taamaammat uteqqittariaqarpara, innuttaasut eqqakkanik angisuunik sanaartormilluunniit eqqakkanik aqquserngup sinaanut qimagaaginnarsinnaanngitsut, naatsorsuutigalugulu kommunimit aaneqarumaartut. Eqqakkanik tigooraaneq taamatut ingerlajunnaarnikuuvoq. Innuttaasutut pisussaavutit eqqakkanik tigooraariatsit akuerisaasut atornissaat, “ Frank Rasmussen oqarpoq.
Nuummi innuttaasutut eqqagassaatitit angisuut Ikuallaaviup eqqaani Eqqakkanik Tigooraavimmut tunniutissavatit.
Ukiumut marloriarluni – upernaakkut ukiakkullu – piffissani aalajangersimasuni najukkavit eqqaanut eqqakkanik aallernissamik Kommuneqarfik Sermersooq neqerooruteqarpoq, neqeroorummullu sinaakkutissat siusinaartumik tusarliunneqartarput.
Eqqakkat avatangiisinut innarliutaanngitsumik suliarineqarnissaat Kommuneqarfik Sermersuup qularnaassavaa, neqerooruteqartarporlu illit innuttaasutut eqqagassaatitit qaqugukkulluunniit igissinnaaniassagakkit.
“Eqqakkat nammineerlutit pilersitatit apuuffissaminnut apuunnissaat nammineq isumagissuat. Nuup eqqiluitsuutinnissaa eqqagassaqartinnaveersaarnissaalu tamatta akisussaaffigaarput,” Frank Rasmussen oqarpoq.
Sapaatip akunnerani uani marlunngornermi, pingasunngornermi sisamanngornermilu Nuup qeqqani eqqaavilerisut katersissapput. Upernaaneranilu eqqakkanik allertitsinissarnut maanna periarfissat kingulliugallarpoq. Eqqakkatit aatinniarukkit Eqqakkanut Tigooraavimmut nalunaassaatit.
Kommuneqarfik Sermersuumi Eqqakkanik Tigooravik
affald@sermersooq.gl
Oqarasuaat: 36 74 11
Nuummi maajimi juunimilu eqqagassanik annertuunik katersineq