Aningaasaqarnermut Inuussutissarsiornermullu Ataatsimiititaliaq ulloq 22. juni 2018 aalajangerpoq, kommunimut pilersaarummut tapiliussaq 4D12-1 tamanut tusarniaavigineqassasoq.
SIUNERTAQ
Kommunimut pilersaarummut tapiliussassatut siunnersuut »Viska, horses & rooms« pillugu pilersaarut tunngavigalugu suliarineqarpoq, pilersaarusiorneq pillugu inatsisissatut allannguut 1. januar 2016-imeersoq naapertorlugu, taannalu 13. juni 2017-imi kommunalbestyrelsimit inaarutaasumik akuersissutigineqarpoq.
Kommunimut pilersaarummut tapiliussami tikeraanut illuaqqanik tallimanik attartortinneqarsinnaasunik initalinnik sanasoqarnissaanik periarfissiissaaq, taakkulu saniatigut siunnersuutigineqarpoq café-liortoqarsinnaasoq, garage-liortoqarsinnaasoq, hiistit iniliortoqassasoq aammalu hiistertarfiliortoqassasoq. Immikkoortumut Qarsaami kaajallaasarfiup eqqaaniit aqqusineqassaaq, sanaartugarlu tamat innaallagissamut imermullu aqqutaataannut aamma kuuffissuarnut attavilerneqassaaq. Pilersaarummittaaq aasaanerani ivigartortitsisarnissamut,
aasaaneranilu ungaluusanut nuunneqarsinnaasunut ukiorlu tamaat atorneqarsinnaasunut nunaminertamut ilaatinneqarput.
Siunnersuut illoqarfimmi innuttaasunut takornarianullu sukisaarsarfissaqartitsissaaq, aammalu hiistertarfeqassalluni immikkut sungiusartitsissutitut, sunngiffimmi hiisterneq, hiisterluni asimukarneq allarpassuillu sumiiffik suli tamanit tikinneqarsinnaassaaq.
Illoqarfiup qanittuani sukisaarsaartitsisarfittut suliniut taanna Sanarfinermut Avatangiisinullu Ingerlatsivimmit illoqarfiit pingaarnersaannut Nuuk qitiutillugu periusissiamut naapertuulluinnartutut nalilerneqarpoq, innuttaasut takornariallu illoqarfiattut pingaarnertut. Peqatigitillugu sunngiffimmi sammisassaqarfiuvoq nutaaq, Qinngutsinni najugaqarfiit Nuullu sinneranut avatangiisiinik qaffaallatsitsisussaq.
TAMANUT SAQQUMMIUSSINEQ
Siunnersuut tamanut tusarniaassutigineqassaaq sap.ak. 8-ni piffissami 27. juni – 22. august 2018.
Tusarniaassutigineqarnerata nalaani siunnersuummut oqaaseqaateqarnissamut akerliliissuteqarnissamullu periarfissaavoq.
Oqaaseqaatit akerliliissutillu Kommuneqarfik Sermersuumi ulloq 22. august 2018 nallertinnagu tiguneqareersimassaput nassiunneqassappullu uunga Kommuneqarfik Sermersooq,
Sanarfinermut Avatangiisinullu Ingerlatsivik, Postboks 1005, 3900 Nuuk imaluunnit mailikkut: sai@sermersooq.gl
Oqaaseqaatit akerliliissutillu piffissaagallartillugu tiguneqartut Kommunalbestyrelsimi inaarutaasumik kommunimut pilersaarummik suliarinninnermi ilaatinneqassapput.
INATSISINUT TUNNGASUT
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut sanaartorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
PILERSAARUT UANI ATUARNEQARSINNAAVOQ
Kommunimut pilersaarummut tapiliussaq kommunip nittartagaani atuarneqarsinnaavoq sermersooq.gl, kommunimi innuttaasunik sullissivimmi, kommunillu nittartagaani sermersooq.gl imlt. Sanarfinermut Avatangiisinullu ingerlatsivimmut oqarasuaammut 36 74 00-imut sianerluni saaffiginninnikkut pissarsiarineqarsinnaavoq.